Kum 20 Leng A Paw Chungah Cehrep Ummi Pa Nih A Sungh Man Cozah Sin Bawmhnak Hal Lai
TCP-Online| 2018 June 23| A luancia kum 26 lio ah paw lei dam lo ruang i hlainak (Surgery) rak tuahmi pa U Win Khein nih hlainak room i hmanmi cehrep cu a paw chung ah kum 20 leng um in a tuar caah a sungh manh vialte cozah sinah bawmhnak kan hal lai tiah a nupi Daw Tin Maw nih a chim.
U Win Khein (Kum-50) cu 1992 kum khan a pawpi le a ril lei a fah caah an umnak khua Irrwaddy ramthen Hinthatah pengkomh siizung ah a rak i zoh. Aa zohnak Hinthatah General Hospital nih cun a paw a hlaipiak i zung 6 tluk a simi cehrep a paw chungah an rak nganh tak.
A paw lei aa hlai hnu hin kum 20 leng cu rian zong tuan kho lo in siizung ah aa thlop peng rih. A thloptu siibawi zong nih a damh khawh ve lo tikah Ultrasound le X-ray lak a fial tikah a paw chungah cehrep cu a hmuh i a rannak in hlainak lei siibawi te sin a ap colh hna.
Hinthatah General Hospital nih an hlai tikah a paw chung cun hlainak room nih rak hmanmi cehrep zung 6 saumi cu an chuahpiak.
U Win Khein cu leithung in paw aa cawm mi a si tikah a damlo ruang hin an ngeihmi thilri vialte zong zuar dih in a rak i thlop. Kum 20 leng cuticun a rak i thlop tikah tukum June 19 ni ceo khan a paw chung um cehrep an chuah khawh.
“Kan pa a rak zohtu siibawi te pawl zong sual kan phaw lo i taza zong cuai kan tim hna lo. Kum 20 leng kan pa kan thlop nakhin kan inn le lo vialte zong kan zuar dih cang. Cucaah, tubantuk in harnak kan ton cu cozah sinah kan sungh manh hi hal kan timh i a si ko” tiah U Win Khein nupi Daw Tin Maw nih cun a chim.
Ref;Eleven
About The Author
