Kyainseikgyi Khuachung Um Ralkap Sakhaan le Bawmnak Pek Ding A Ra Mi Pawl Kahdohnak Ah Ralkap Lei 45 An Thi
The Chinland Post | 2023 November 6 — Karen ram, Kyainseikgyi khuachung ah a um mi ralkap sakhaan pawl le bawmhnak pek ding a ra mi pawl cu an kah hna i ralkap lei 45 an thi i hriam le kuanzen tampi an lak khawh tiah SOF le Lion Battalion Commando nih thawng an thanh.
November 2 ah Kyainseikgyi khuachung ah a um mi palek sakhaan, GAD zung, Lah-wah-kah zung, Thit-taw le meithat zung pawl ah hmunhma a khuar mi ralkap pawl cu KNLA phufonh nih an kah hna i ralkap lei 11 an thi, tampi hliam an tuar, MA-1 zuun 1, MA-2 zuun 1, Launcher 1, kuanbawm 15, 5.56 kuan 790, luchin le kuan khamnak 1 le Computer hna an lak tiah theih a si.
Kahdohnak chung ah KNLA Special Operation Force, Lion Battalion, Cloud Wing le Pung Na phu hna an i bawm tiah theih a si.
November 2 zinglei sml 7:00am in zaanlei sml 4:00pm tiang ralkap kwilone sakhaan cu KNLA, SOF, Federal Wings, SOG, Cloud Wings Drone phu hna nih sakhaan chung tiang an va kah hna i ralkap 4 an thi, cheukhat nih sakhaan an zaamtak tiah theih a si.
Cubantuk in October 26 le 27 ah KNU Brigade 6 hmunhma ah a um mi ralkap Phoechi sakhaan le riahcaw a rak phor mi thazang 100 hrawng IB 358, IB 558, LIB 561, LIB 557 hna cu KNLA phufonh nih an kah hna i ni 2 chung kahdohnak a fak i ralkap lei 30 hrawng an thi i tampi hliam an tuar caah hnu an kir ṭhan tiah theih a si.
Kahdohnak chung ah KNLA S.O.F hruainak in dothlennak phu tampi an i bawm tiah theih a si.
About The Author
