Kyaukdaw Khua Byuha Sakhaan In Ralkap 200 Hrawng AA Sin Ah A Sung An Pek
The Chinland Post | 2024 January 9 — Shan ram chaklei, Laukkai hrambunh MOC nih hriam chiah in a sungh an pek hnu ah Rakhine ram, Kyaukdaw peng, Taungshay tlang byuha sakhaan zong in ralkap 200 hrawng (sakhaan pakhat ning) nih hriam chiah in a sung an pek tiah AA nih an thanh.
Cun hmundang ralkap sakhaan pawl zong nih hriam chiah ding in pehtlaihnak a tuah mi zong an um tiah theihternak an tuah.
Taungshay tlang byuha sakhaan lak kahdohnak chung ah AA he bawm in dothlennak phu cheukhat zong kahdohnak an tuah ve tiah an langhter nain phu min an langhter lo.
Paletwa hmunhma zapi hi ralkap an thiannak hmunhma a si khawh nakhnga AA nih ralkap sakhaan pawl a kah cuahmah tiah an thanh.
January 7 thawk in Paletwa hmunma ni tlaklei ah a um mi ralkap sakhaan zong an lak khawh tiah an langhter.
A tang mi ralkap sakhaan pawl zong caan rau lo te ah tlamtling tein lak khawh ding kan i zuam lio tiah theihternak an tuah.
Chinletwa sakhaan in a zaam mi ralkap 104 cu India ramchung ah Assam Rifle bawmhnak in an zaam tiah an chim.
2023 December 29 ah Point 377 sakhaan in ralkap 151 cu India ramchung ah an zaam. Cu ralkap pawl cu India cozah nih January 2 ah ralkap council sin ah a ap ṭhan hna.
Mrauk-U peng Tinkyitdaw tlang sakhaan cu January 7 zaanlei sml 4 ah AA nih tlantling tein an lak khawh i ralkap thilri le hriam tampi zong an lak khawh tiah an thanh.
About The Author
