Kyaukhtoo in Mindat lei ah SAC ralkap mawṭaw an kai
The Chinland Post | 2022 July 20 – Pakokku in a rak chuakmi SAC ralkap mawṭaw pawl cu July 20 zinglei ah Kyaukhtoo in Chin ramkulh Mindat lei an kai caah kahdohnak a chuak kho tiah theih a si.
July 17 ah Magway ramṭhen, Pakokku peng in Chin ramkulh, Mindat-Matupi lei ah a rak kaimi SAC ralkap mawṭaw pawl cu July 20 zinglei ah Kyaukhtoo in an rak chuak cang tiah theih a si.
CDF-Mindat biachimnak nawl a ngeitu pakhat nih “Kyaukhtoo in Mindat lei ah an rak kai cang i SAC ralkap mawṭaw 65 a si tiah kan theih. Mindat khuachung an luh ahcun a fiang deuhmi thawng kan theih ko lai. Atu cu Mindat he aa naihnak bikah a hmailei mawṭaw pawl an phan cang. SAC ralkap mawṭaw pawl Mindat-Matupi lamcung an kal ahcun kan tlaihnak hmunhma a si caah ṭha tein timhtuahnak kan ngei” tiah Khonumthung Burmese ah a chim.
SAC ralkap pawl nih atutan Mindat lei an rat ahhin timhtuahnak ṭha tein an ngeih mi a lo i Mindat lei an ratnak lam thluangthluan ah hriamngan/hme kahthlorh in an kah tiah theih a si.
Kyaukhtoo le Mindat kar hi meng 18 aa hlat i SAC ralkap pawl nih khuate hna ah Drone in ngiathlainak an tuah i vanlawng pawl zong a zuan caah a pawngkam khuami hna nih ralrinnak ṭha tein ngeih ding tiah CDF-Mindat nih a thanh.
Mipi hna zong nih Mindat-Matupi lamcung kal rih lo ding in July 18 ah CDF-Mindat nih a thanh.
About The Author
