Kyauktaga Ah Ni 2 Chung Kahdohnak Pehzulh In A Chuak I SAC Ralkap 25 An Thi
The Chinland Post | 2023 July 11 — Bago ramṭhen, Kyauktaga peng chung ah a um mi khuate pawl ah a rak lut mi SAC ralkap le KNLA Brigade 3, Kyaukkyi PDF phufonh hna karlak ah ni 2 chung kahdohnak pehzulh in a chuak i kahdohnak pawl chung ah SAC ralkap 25 an thi tiah theih a si.
Thazang 150 hrawng SAC ralkap pawl cu a luancia July 5 zinglei thawk in Kyauktaga peng, Nanza le Puakbin khuate pawl ah an phan i dothlennak phu pawl he kahdohnak aa thawk tiah theih a si.
“July 5 zinglei sml 2:30am hrawng ah kahdohnak aa thawk. Deilei tiang kahdohnak chung ah SAC ralkap 15 an thi” tiah Nanza khuami pakhat nih Ayeyarwaddy Times ah a chim.
Kahdohnak a chuah hnu ah a sung tuk mi SAC ralkap pawl nih July 6 zaanlei sml 5:00pm hrawng ah Nanza khuachung ah phu 3 ṭhen in an rak luh ṭhan caah kahdohnak a chuak ṭhan.
“July 6 zaanlei in zinglei 7:00am tiang kahdohnak ah SAC ralkap 10 an thi chap, SAC ralkap pawl nih Sin-Oo-La-Ha khua mipi inn an khangh” tiah khuami pakhat nih Ayeyarwaddy Times ah a chim chap.
Cu SAC ralkap pawl cu KNLA, PDF nih an kah hmasa mi hna a si caah kahdohnak kong he pehtlai in online cung ah a rannak in tar colh lo ding tiah PDF phu pawl nih nawlnak an tuah i cu bantuk in nan tar colh a si ahcun hmailei ah tuah kan i timh mi thil pawl a hnorsuan khawh tiah an langhter.
About The Author
