Taingen Khua Ah SAC Ralkap Le Mipi Ralkap Hna Karlak Ah Kahdohnak A Chuak Ṭhan
Salai Mangpau | July 11, 2023 |
Tedim peng, Taingen khua um SAC camp cu Mipi ralkap phu nih July 11, zing 5:00am ah an va kah tiah theih a si. Kalaymyo um SAC ralkap nih hriamngan in voi 7 kah an bawmh hna. Cun Kalaymyo in SAC ralkap motor 5 le minung tlawn deuh an hun kai tiah theih a si.
Taingen khua hi Kalay in Falam – Hakha lei le Taingen in Tedim- Rih lei kalnak lamton umnak hmun a si. Cucaah July 1 ni in nihin ni tiang Kalaymyo in eidin le thilri phortu motor lam cu Taingen khua in SAC nih um kal kho lo in lam an phih.
CDF-CDM Siyin nih Taingen khua um SAC camp um mi hna nih mipi ralkap an si tiah lunghringh ruang ah an tlaih mi an tlawn ti lo. Cucaah mipi ralkap lei nih Taingen khua mipi hna sin ah khua chuaktak rih in a himnak hmun ah um chung ding tiah June 30 ni ah thawngthanhnak an rak tuah. Ca thawngzamhnak an tuah hnu July 1 ni ah SAC ralkap 60 cu Kalay in Taingen khua ah an hun kai colh ve.
A luancia 2022 January 16 ah Kawl ralhrang pawl cu Kalaymyo in Chinram lei ah hmai nawr kho lo in Hiangzing khua ah an taap peng rih. Mah lio zong ah Kalay University ah hmunhma a khuar mi Ralhrang hna nih hmunhlaat kahnak miakpi in Laitlang lei hehchet tiah an kah. Mah lio kahdohnak ah ralhrang ruak hnih hmuh a si leng ah Meithal zuunkhat an char chap, Ralhrang Meithal zuun 4 le zenkuan zeimawzat Chin ralkap hna nih an laak khawh. Ralhrang nih Jet vanlawng in bomb an thlak ruang ah Chin ralkap hliamfaak mi lak ah CNA lei in Sergeant Pum Tuan Thang@Puia nih ram le miphun caah a nunnak a pek. Mipi Ralkap aa hliam mi dang minung 6 hna cu a himnak hmun ah an rak phanhpi bal.
About The Author
