Kyunhla khua kahdohnak in SAC ralkap ruak le hriam lak khawhmi an langhter
The Chinland Post | 2022 August 29 – Sagaing ramṭhen, Kyunhla pengah a chuakmi kahdohnak ah mipi hriamtlai kut in a thimi SAC ralkap ruak pawl le lak khawh a simi hriam pawl cu Kyunhla mipi cawlcanghnak phu nih August 28 ah hmanthlak he an rak langhter.
Sagaing ramṭhen, Kanbalu pengkomh Kyunhla peng, Aungchantha khua pawng August 23 zinglei ah mipi hriamtlai le SAC ralkap karlak ah kahdohnak a chuak.
Kyunhla peng Nyaungkone khua mei an khangh hnuin a rak kirmi SAC ralkap 60 hrawng cu Kawlin PDF le Kanbalu battalion 1,2 le Kanbalu peng hriamtlai phufonh hna nih an rak kah hna.
Sml 3 leng kahdohnak chungah SAC ralkap bo 3 bawi pahnih le bo 1 bawi pakhat a nung in an tlaih hna i hriam tampi zong lak kan lak khawh tiah Kanbalu battalion 2 nih a thanh.
Lak khawhmi hriam pawl cu MA-1 zuun 2, MA-2 zuun 2, MA-3 zuun 3, MA-4 zuun 1, 60 MM 2, RPG 1 le kuan 2, MA kuan bawm 55, 60 MM kuan 18, 5.56 kuan 1,867, 40 MM kuan 6, bom 4, luchin 6, bomrap 5, Icon 5, kuttuah meithal zuun 1, kuttuah kuan 1 rawn meithal zuun 1, mei kuan 2, Jumper 1, Hmat-pung-ṭin 2, 84 MM 1, MA pistol 1 le kuan bawm 2 an si.
About The Author
