Laukkai Khua Thianhnak Ah Hriam Phun Tling 631 An Lak Than, Minung 23 An Tlaih Hna Tiah MNDAA Nih Thawngthawnhnak A Tuah
The Chinland Post | February 6, 2024 — Shan ram chaklei, Kokang ram Laukkai khua thianhnak an tuah lio ah hriam phuntling 631 an lak khawhnak kong cu February 5 ah MNDAA nih thawngthanhnak a tuah.
No. 1 Special Region uknak committee nih phungning lo rianṭuantu hna, Online mihlennak rianṭuantu pawl thianhlianhnak rianpi a ni 4 nak ah thawngthanhnak an tuah hi a si.
Online in mi a hleng mi minung 23 telh in hriamnam le kuan/zen zong an tlaih chih hna. An tlaih mi hriamnm ah hriamngan telh in Rifle in kuan-zen tampi an laknak kong cu Tuluk ca in an langhter.
Shan ram chaklei 1027 operation chung ah SAC tanks le thirphen motor tanks 23, Howitzers miakpi 7 an lak khawk hlei ah ralkap tampi an thi mi le meithal he hriam chiah in a sungpe mi tampi an um tiah MNDAA nih thawngthanhnak a tuah.
MNDAA nih 1027 operation chung ah Kokang ram chung ah peng 6, ramri gate 4, ralkap sakhan 300 leng le tanks le Howitzers telh in meithal thong reng lo le kuan/zen tampi kan lak khawh tiah Tuluk ca in thawngthanhnak a tial. Thirphen motor tanks an lak mi 19 le tanks 4 aa tel, mah chung in 5 cu mei an khangh.
Kokang ramchung kahdohnak ni 71 chung ah SAC ralkap mi 4,000 hlei an thi, 2,000 tlaih an si, hliamtuar mi a thong leng an si caah unau hawikom phu lei nih Myanmar tuanbia ah a um bal lo mi tuanbia thar kan tial tiah MNDAA nih a chim.
Unau hawikom phu nih 1027 operation an thawk in thla thum chung ah hriam chiah in a sungpe i nunnak zuah a si mi ralkap 6,000 an um cang. Mah hna cu Shan ram chaklei, Laukkai khua lak kahdohnak chung in 3,000 hrawng, Rakhine ram Kyaukdaw peng ah ralkap 500 hrawng le Ratheduang, Mrauk U, Minbya peng le Shan ram chaklei peng hna in an si.
Cun, SAC lei in ralbawi Brigadier General 7 hna hi kahdoh hau lo tein a sung an ka pek tiah a tial chap. MNDAA ralkap bu hruainak in Ta’aung ralkap TNLA le AA ralkap nih October 27, 2023 kum ah 1027 Operation tuah in kahdohnak hram an thawk hi a si.
About The Author
