Liamcia Caan Khuakhan Lairelnak Kongah Ralkap Thuam Hruk In Ngaihthiamnak Bia A Chim Mi Kayah (Karenni) Chief Minister
Salai Mangpau | July 24, 2023 — SAC Ralhrang uknak a lak hnu in ralhrang ral in a lautmi Kayah ram Chief Minister U L Phaung Sho nih a hman mi Facebook ah ralthuam hruk mi a hmanthlak a tarlanghnak ah liamcia can khuakhan lairelnak ruangah mipi cheukhat sungh zatlaknak le harnak a ton mi sin ah ngaihthiam halnak ca a tial.
Dawtnak in riantuan a si ko bu in kan tlamtling lonak zong a um ko tiah July 18 ni ah facebook ah a tar.
“မိမိရဲ့ကြပ်မတ်မှုအားနည်းချက်ကြောင့် ပြည်သူအချို့ထိခိုက်နှစ်နာမှုရှိခဲ့ပါတယ် အဲ့အတွက် ထိခိုက်နှစ်နာသူအစုအဖွဲ့ အသီးသီးအပေါ်ကျွန်တော့အနေနဲ့လေးနက်စွာ ဝန်ချတောင်းပန်အပ်ပါတယ်ခင်ဗျာ” tiah kawl ca in ngaihthiam halnak a tial.
Zeiruangah sungh zatlak le harnak an ton ning a si ti a ruang a langhter lo.
“A fek chimchim mi thazaang lak in funtomnak bu dirh le kan timh mi teinak aa lan phanh khawh ding ah kan kal ti hna lai” tiah a tial chap.
Myanmar rampi huap ramthen le ramkulh chief Minister 14 an ummi ah mi tam deuh cu nihin nitiang tlaih an ton.
U L Phaung Sho cu siangcachim saya rian a tuan bal mi a si. A mah hi Loikaw peng khuate pakhat chuak a si i Chief Minister rian a tuan lio ah kum 44 a rak si.
2015 democracy thimnak ah NLD party in MP aa cuh i theinak a hmu hnu ah Chief Minister rian an tuan ter.
Nihin ah U Phaung Sho cu PDF ralkap thuam hruk in a semnak ram ah ralhrang dohnak ah aa tel. An ram PDF cu Myanmar ram chungah thazang thawng mi hriamtlai bu pakhat ah a hun cang.
Karenni (Kayah) ram hi SAC ralhrang bawi pawl umnak Naypitaw he aa naih ngai mi hmun ah a um i kahdohnak a zualhma mi ramkulh pakhat aa tel.
Khua le ram Mipi zaamtak lo mi U Phaung Sho Upatnak he…. tiah a tial –
About The Author
