Luti Luannak Thate In An Tuah Lo Ahcun Hakha Khuapi A Hrawh Dih Lai

Tawk Tling Thang| 2019 June 24| Hakha khuapi chung luti luannak pawl thate le felfaite in an tuah zokzok lo ahcun Hakha khuapi a rawk kho tiah Hakha khua upa pakhat nih The Chinland Post ah a chim.

“Hakha khuapi chung luti luannak pawl felfaite in an chek than i an siamremh than zokzok a herh. June 22 ruah caan tawite chung a surmi hmanh nih Pyidawtha sang Shwemyodaw luti hor a phih dih manh. Cuti a phih dih ruang ah Hakha Bogyoke lampi cung in ti a luang dih. Cu pin ah hmunthur vialte lampi cung ah a phahtak dih. Hika Shwemyodaw luti luannak hor lawng a si lo, hmundang, kadang luti luannak zong an si cio dih. Cucaah, hiti in tuanvo ngeitu hna nih an daithlanh i an sersiam colh lo ahcun Hakha khuapi a rawk than ko  lai. Lamthlang lei ummi inn pawl hrimhrim cu an rawk, an cim kho”.

“Hlan ahcun luti luannak tiva hor pawl hi pe 10 kau in rak tuah lengmang a si. Atu cu inn ngeitu pawl nih hmun an det chin lengmang ruang ah pe 5 tluk lawng a taang cang. Pe 5 tluk lawng a si cang tikah ruah a fah tikah luti a lan kho dih ti lo. Dingrep ngei lo in hmunthur an hlonhmi pawl a van fenh chinchap ahcun a ka a phih dih colh i luti luannak ah luti luan ti lo in lampi cung ah an luang dih. Fih zong a nuam i ngandamnak ca zong ah tih a nung. Hmun ri deet hmangmi pawl nih thate in an chekfel i dan an tat hna awk le luti luannak hi thate le felfaite in an tuah colh a herh” tiah min langhter a duh lomi Hakha upa pakhat nih a biapeh ah a chimchap.

Hakha khuapi chung hi luti luannak an tuahmi  a bit tuk ruang ah ruah a fah cangka in lampi cung ah a luang chih. Cun felfaite in concrete an thlet lo ruang ah luti luannak zong faktuk in vawlei a khuarh i cheukhat inn  ngeitu hna caah tih a nung ngai tiah kan theih.

Leave a Commnet

%d bloggers like this: