Sacuai Zohfelnak Tahnak An Ngei I Thantlang Market Sathahnak Ralrin Pek An Tong
Salai Elvis|2019 June 24| Thantlang khuachung Market Sa zuartu hna nih mizapi an herhning, an duh ning le sipin nih rikhiahpiak ning tein zuarding kong tukum June thla chung lawng ah voi hnih zohfel piak le ralrin peknak an tuah hna tiah an theih.
June 15 ni ah Thantlang sipin lutlai Pu Van Uk telh in tuanvo ngeitu hna nih sa zuarnak hmun zohfelnak an ngeih mi chungah Sa cawk tikah rikhaih mi cuai khat 9000 si lo in 10000 in lak lo ding kong, Sa an cawk cia mi cuai dang in zohfel piak nak, a voi hnihnak June 22 ah chekhlatnak le ralrin penak zong an ngeih hna.
“Thantlang sa man cu cuaikhat 9000, cuaitan 4500 a si dingmi ah sa chappiak in cuaitan ah 5000 in mipi an pek mi hna hmuh khawh a si nak, cucaah cuaitan cawk a duh mi hna nih 4500 bak kha a pek awk a si lai i sa that pawl zong nih cuaitan zaka ah a nek um lo tiah 5000 in lak hrimhrim lo ding kong biahrennak an tuah. Hi biahrennak le zohfelnak nawl a ngai lo mi Sa that cu fakpi in dantatnak kan tuah hrimhrim hna lai pinah a herhningin sipin riantuan tu zong nichiar tein a hngaktu zong chiah an si lai nak kong le hi kongah sa that tu zong ralrin a herhnak kong” sipin lutlai Pu Van Za Uk nih a mahpumpak facebook Account ah a tarlangh.
“Voksa hi cu an khiah ning tein kan zuar ko. Cuaitan tu hi a caw tu nih 5000 man in ka tuah piak a timi zong an um cun 500 a kahnak kan ngei lo caah kan in chap hna lai kan ti hna i kan chap hna caah 5000 in kan lak hna. Sa sen zong 9000 in kan zuar ko nain Sa a caw tu nih a tit that deuhnak(a phei tit) khi rak ka pe u law 10000 in kan pek hna lai a timi zong um caah an mah nih an kan ti ning 10000 in kan pek ko hna. Satil man zong a fah tuk pin ah cawk awk a har ngai, Matupi le Mizoram lei tiang te hna kan kal ve” tiah Sa that mi ah tuanvo ngeitu Nau Cung nih TCP ah a chim.
A tu lio Thantlang Sa that mi nih Lai vok a man fah pin ah an i zat lo caah Kawl vok deuh an thah hna i zarhkhat ah vok 6 tluk an thah, Sa sen (Caw, Na, Sia) hi pum 4 tluk an thah ve. A tu lio Thantlang khuacung ah Lai vok pakhat ah 380,000 in 400,000 tiang a man phan i Sa sen a bikin Na hi sing 11 tluk hrawng a phan tiah kan theih.
Atu bantuk in Thantlang sipin nih a luancia kum zongah voi hnih tiang ralrin an rak pek bal hna. Voi thum tiang nawl an ngeih lo ah cun an Lisence tiang chuh khawh a si. Sipin nih sa man ri khiah piak mi hna cu, Sa san le Vok cuai khat 9000, Saruh cuaikhat 5000, a chungril cuaikhat 6000, (vok chungril cuaihkhat 5000) a si i cuai a tlin le tlin lo mah nih thlai khawh a si i Sacuai a tlin lo ahcun a tanglei (Ph; 09454477440, 09440706866, 070-60096)sipin upa te sin ah phuan khawh a si tiah Sa thahnak kam ah Committee nih ca an tar.
About The Author
