Malaysia Riantuan Myanmar Rammi Myanmar Palai Zung Nih Ralrin Pek
Salai Aung Aung| 2018 June 10| Malaysia cozah nih June 1 khan phungning loin an ramchung riantuanmi tlaih khihnak a thawk cang caah palai zung nih an ramchung ah riantuanmi Myanmar rammi pawl cu Malay i Myanmar palai zung nih ralrinnak a pek hna.
Malaysia ah riantuan duh ahcun phungning te lawng in kal awk a si cang tiah Myanmar-Malaysia pehtlaihnak palai zung tuanvo ngei nih an chim.
Daw May Thu Phyo nih, “Timhlamhnak an tuah i minung an tam lio te ah an tlaih hna. Myanmar rammi Malay ah riantuan duh ahcun phungning tein an rat ding kan duhpiak hna. Phungning tein an tuan ahcun riantuannak i pakhat khat khondennak a um sual tik zongah upadi ning tein liamh kan hal khawh hna. Thih lohnak kan ton sual hmanh ah lu man hal khawh a si. Phungning loin an rat tikah cun zeihmanh kan ti khawhmi a um ti lo. Cucaah hika i riantuan a duhmi cu phungning tein ra hna sehlaw a tha bik” tiah a chim.
Malaysia cozah nih an ramchung i phungning loin a ummi riantuantu hlan ding kong a tawlrel ti lo leng ah hi kong buainak cu biatak tein upadi he rengh a timh cang tiah theih a si.
June 1 in tu tiang ah minung 170 an tlaih cang hna. Asinain Myanmar rammi zeizat an i tel ti cu hngalh a si rih lo.
Malaysia ahhin thong inn 11 a um i an tlaihmi hna poh cuka thonginn hmun pawl ahcun an kuat tawn hna.
Cu thong chung ummi pawl cu Myanmar kir an duh ahcun palai zung nih an tawlrel hna i May thla chung ah khan Myanmar rammi 200 palai zung tlangtlaknak in an tlung tiah theih a si.
Tu lio Malaysia ram chung ah Myanmar riantuan mi sing li (400,000) leng an um i cu chungah phungning tein a ummi sing 2 tluk lawng an si tiah kan theih.
Ref: RFA
About The Author
