May 28, 2024

March 14 Camipuai Phit Dih Hnu Ah Lai Siangngakchia Cheukhat Le Hringtu Nu Le Pa Hna Hmurka

0

City Hunter| 2018 March 14| Tukum Hakha ah tanghra camipuai a phimi Lai siangngakchia pathuam nih camipuai an phit chung vialte lakah an i nuamh bikmi ni le an i ngaih bikmi ni fiangte in The Chinland Post ah an chim cio. Cu bantuk in boarder riantuantu saya pakhat le hringtu nu pakhat zong nih tanghra camipuai kong ah an lungum bia an chim ve.

Hakha, No.3 siangsanrung ah a phimi Lai siangngakchia Thawng Thawng nih, “tanghra camipuai ka phit chung vialte lakah nihin (March 14) hi kaa ngaih bikmi ni a si. A ruang cu camipuai kan dih ni a si caah a si. Asawng (boarder) ah puanbu tom ka laak i inn ka hlam ni le lungdaite in inn i ka riah zan a si lai pin ah March 15 zingka te in ka thawh lo ni zong a si fawn lai. Cu chinchap ah ka phitmi subject vialte lakah Economics hi ka phit khawh bik ni a si fawn. Cucaah, March 14 hi camipuai ka tuah chung vialte lakah kaa nuamh bik ni le philh awk a tha lomi ni a si” tiah The Chinland Post ah a chim.

No.3 siangsangrun thiamthiam ah camipuai a phi vemi Cer Bawi nih, “Nihin Eco phit cu a nuam taktak. Ka zohmi lawngte an ra, ka phit khawh bikmi subject a si. Atu tlawmpal ah asawng ah ka puanbu tom ka la lai i zanlei hi ka tapa he khua ah kan tlung colh lai. Nihin cu camipuai ka dih a si caah ka thaw a chuak tuk, ka chungle zong an thaw chuak deuh cang lai. Sungh le awn tu cu Pathian nawl si ko seh” tiah The Chinland Post ah a chim.

No.a siangsangrun ah a phimi Lian Lian nih, “Camipuai tuah vialte lakah cun nihin bantuk camipuai dih ni tluk hi a nuammi le a sunglawimi a um ti lo. Caan karlak kan phitmi subject ka phit khawh lio caan i kaa nuamhmi nihkhin nihin kaa nuamhmi cu a tluk naisai lo. Camipuai dih ni si, camipuai phit khawh chinchap si, asawng ah it cang uh ti le zingkate in thawh a um ti lai lomi hrimhrim ka ruah ah kaa nuam tuk eh! Camipuai sungh awk chuah te lain akin camipuai dih lai i camipuai kan thawkka in ka rak i ngaih deuh cang” tiah The Chinland Post ah a chim.

Art major a la i camipuai a dih rih lomi siangngakchia pakhat nih, “Kan hawile cu nihin ah camipuai an dih i an i nuam tuk cang. Kannih cu kan dih rih lo caah thaizing le kip khi hawi hnu ah kan phi rih lai. Tuzan cu asawng ah kanmah lawng kan riak fawn rih lai. Hmunkhat ah kan dih ti lomi hi a poi ngai, kan thinlung a vakvai. Ca zong khi thathi in kan zoh kho bal lai lo” tiah The Chinland Post ah a chim.

Tanghra camipuai phi a dongtu hringtu nu pakhat nih, “Nihin ka fale pahnih camipuai an dih a si i ka thaw chuak tuk cang lai. An phit khawh le phit khawh lo cu va um rih seh, camipuai an phit chung cu anmah retheih lawng si lo in kan chungkhar ning in kan re a thei. Lo kan thlawh i lohma kan chuah le rian nganpi pakhat kan lim tluk ah khin ka ruah. Theipar tha a vuai le vuai lo, an sungh le an awn kong cu PATHIAN nawl si ko seh” tiah The Chinland Post ah a chim.

Hakha Boarder ah riantuantu saya pakhat nih, “Kan naule Bio le Eco major pawl camipuai an dih cang caah anmah cu chim lo kanmah lila zong tampi kan thaw a chuak. An sungh le an awn khi cu va um rih sehlaw rian pipa pakhat lim tluk khi a si. Kan fale English (Mirangca) a phi kho lomi belte an tamtuk i kan lungre a thei ngai” tiah The Chinland Post ah a chim.

March 14 cu Biology le Economics major a lami siangngakchia paoh camipuai an dih cang caah asawng ah an puantom an i lak i an inn an hlam ruangmang cio cang hna. A cheu cu khua lei ah a tlung manh cangmi zong an um. Art major a lami belte cu subject pahnih- Geography le History a taang rih. March 15 khi Geography le March 16 khi History an phi rih lai tiah kan theih.

About The Author

Na ruahning rak langhter ve.. (Leave a comment)