March 30 Ah U Win Myint Nih President Biakamnak Le Biarocah Chimnak A Ngeih Lai

City Hunter| 2018 March 28| March 28 ah thim tharmi avoi 10nak Myanmar rampi President U Win Myint cu a ralaimi March 30, ramkomh hluttaw ah President biakamnak le biarocah (speech) chimnak a ngei lai.

March 28 ah tuahmi Ramkomh hluttaw a dih hnu ah President U Win Myint nih, “Mizapi thatnak rian cu ka thazaang le ka fimthiamnak dihlak chuah in ka tuan lai tiah a chim.

Myanmar rampi hruaitu ding ah thimmi President U Win Myint cu March 30 ah tuahdingmi ramkomh hluttaw ah President biakamnak le biarocah chimnak a ngei lai. Hihi Myanmar rampi President sinak in a hmasa bik biarocah chimnak a ngeih a si lai.

President U Htin Kyaw nih president biakamnak a ngeih ni ah minute 3 tluk lawng biarocah a rak chim. Cu lio ah phunghrampi sernak le federal ramkomh sernak kong kha a biapi in a rak chim. President U Win Myint nih zei bantuk biarocah bia dah a chim te lai timi tlangcung hriamtlai bu le ramkhel lei cawlcangtu upa cheukhat nih an ngiat ngaimi le an i hngahhlang cio tiah theih a si.

U Win Myint cu mee 403 in President a tling i President hlun U Htin Kyaw cu mee 360 lawng in president a tling. President hlun U Htin Kyaw cu 2016 March 30 in 2018 March 21 tiang kumkhat le ni 356 lawng President rian a tuan.

2018 March 21 ah U Htin Kyaw nih president rian a chuahtak. Cu ni thengte ah Myanmar president thar U Win Myint nih a rak Pyithu hluttaw Speaker a sinak rian a rak chuahtak ve. Pyithu hluttaw nih president caah an chuahpi bantuk te in President a hung tling taktak. Atu ahcun U Win Myint cu avoi 10nak Myanmar ram hruaitu President a hung si cang.

Ref: RFA

Na ruahning rak langhter ve.. (Leave a comment)

%d bloggers like this: