Matupi kahdohnak ah hriamtlai 1 a nunnak a liam, meithal zuun 4 le kuan tampi an sung
The Chinland Post | 2023 January 17 – Chin ramkulh thlanglei, Matupi peng, Ngalai khua ah SAC ralkap le CDF-Matupi karlak i a chuak mi kahdohnak chung ah CDF-Matupi hriamtlai 1 a nunnak a liam i meithal zuun 4 le kuan tampi an sung tiah theih a si.
January 15 zinglei sml 9:00am hrawng ah Matupi-Hakha lam cung ah a um mi Ngalai khua ah SAC ralkap 100 hrawng an rak luh caah CDF-Matupi he kahdohnak a chuah hi a si.
Kahdohnak chung ah CDF-Matupi hriamtlai pakhat a nunnak a liam i M4 zuun 2, rifle phun zuun 2, cycle 11, phone 7, Auto kuan tampi le tangka sing 15 an sung tiah CDF-Matupi nih January 16 ah a thanh.
SAC ralkap pawl nih Ngalai khua mipi inn an bauh i January 16 zinglei sml 7:00am hrawng ah inn 3 ṭheng in an hrawh pin ah mipi inn 2 an khangh tiah CDF-Matupi nih a thanh.
Ngalai khua kahdohnak ah SAC ralkap 1 a thi tiah theih a si.
About The Author
