June 17, 2024

Maungdaw Yan-aung-min Sakhaan AA Nih An Lak

0

The Chinland Post | 2024 March 26 — Rakhine ram, Maungdaw peng chaklei um SAC ralkap Yan-aung-min sakhaan cu March 23 ah tlamtling tein an lak cang tiah AA nih thawng an thanh.

Cu sakhaan chung ah SAC ralkap ruak pawl, kahdohnak thilri pawl, hriam le kuanzen pawl an lak khawh tiah AA nih a chim.

Yan-aumg-min sakhaan hi Cing-chaung BGF sakhaan a hnulei ah a um mi a si i AA nih BGF sakhaan cu thla 1 deng an kulh hnu ah tlamtling tein an lak khawh nakhnga kahdohnak an fahter i ni 2 chung ah hmunhma cheukhat tiang an lak khawh cang tiah AA nih a chim.

Maungdaw khua chaklei um Ta-man-ta sakhaan zong AA nih a kah cuahmah lio i sakhaan in a zaam mi SAC ralkap pawl dawi in an kah hna caah SAC ralkap ruak 20 leng le hriam pawl an lak khawh tiah theih a si.

Cun Buthidaung peng, Ku-pi sakhaan in a zaam mi SAC ralkap pawl cu AA nih kulh in an kham hna i March 20 thawk in an kah ve hna. Buthidaung peng in a hnulei Meter 300 aa hlatnak ah SAC ralkap 12 an thah hna i hriam le kuanzen pawl an lak khawh tiah theih a si.

Rakhine ram ah 2023 November 23 thawk in sakhaan lak kahdohnak an thawk in thla 4 chung ah AA nih Paukdaw, Kyaukdaw, Mrauk U, Minbya, Mebon, Ramree, Ponnakyun, Rathaedaung, Chin ramkulh Paletwa khua hna cu a lak dih cang.

About The Author

Na ruahning rak langhter ve.. (Leave a comment)