Mawrawady Tilei SAC Ralbawi Telh In Ralkap 27 Hriam He An Zaam
The Chinland Post | 2023 July 3 — Taninthary ramṭhen, Dawei pengkomh, Yephyu peng, Kanpauk hmunhma, Mawrawady tilei ralkap Headquarters in Squad pakhat zat a si mi SAC ralkap 27 hriam he an zaam tiah Ayeyarwaddy Times nih a langhter.
July 3 zinglei sml 1:00am hrawng ah Mawrawady tilei ralkap Headquarters in ralbawi, Corporal, Lt. Sergeant telh in SAC ralkap 27 cu ralkap mawṭaw 3 he an zaam tiah theih a si.
“A zaam mi hi an zapi 27 an si. Squad pakhat zat bak an si. Mawṭaw 3 in an zaam. Kanpuak ah mi ngiat ding in duty an ngei i an i chawh pah lio ah an zaam beh tiah theih a si. An mawṭaw pawl cu Kalinaung-Kanpuak lam ah an chiahtak. Atu ahcun zarhkhat chung ah a zaam mi 39 an um cang” tiah SAC tilei ralkap he aa naihniam mi nih Ayeyarwaddy Times ah a chim.
SAC ralkap pawl an zaam hnu ah Ongpinkwin Mawrawady tilei ralkap Headquarters ah a um mi ralkap pawl nih Kanpauk-Kalinaung lam umkalnak nawl an phih i thazang tampi hmang in ramlak lei ah an kalter hna leng ah lam tonnak kip ah minung an check hna tiah a langhter.
SAC ralkap pawl an zaamnak Mawrawaddy tilei ralkap Headquarters in ralkap 27 cu an tlaih ṭhan khawh nakhnga ramlak le hmunkip ah an kawl hna nain an tlai kho hna lo tiah an ṭial.
Cun a luancia June 27 zong ah SAC ralkap in Column Leader, Corporal, Lt. Sergeant telh in SAC ralkap 12 cu hriam tampi he an rak zaam i himnak hmun ah an phan cang tiah Ayeyarwaddy Times nih cun a langhter.
About The Author
