May Thlakhat Chung Ah Hngakchia 19 Telh In Mipi 129 An Nunnak A Liam
The Chinland Post | 2023 June 7 — May thlakhat chung ah Sagaing ramṭhen telh in peng 12 ah SAC ralkap pawl ruang ah mipi 129 an nunnak a liam i cu chung ah hngakchia 19 an i tel tiah NUG nih a thanh.
Kachin, Kayah, Karen, Chin, Mon le Shan, Mandalay, Sagaing, Magway, Bago, Irrawaddy le Taninthary ramṭhen chung ah SAC nih vanlei kahdohnak a tuah ruang, hriamngan a kah ruang le tlaihkhih thahnawnnak ruang ah an nunnak a liam tiah June 4 cathanh chung ah an langhter.
Cu chung ah kahdoh a fahnak hmun a si mi Sagaing le Bago ah a nunnak a liam mi an tam bik tiah an langhter.
Sagaing ramṭhen ah minung 57 tiang an nunnak a liam i hngakchia 8 an i tel bantuk in Bago ramṭhen ah 31 an nunnak a liam i hngakchia 6 an i tel.
A nunnak a liam mi chung ah nu 32, pa 68, hngakchia 19, pum tlamtling lo 3 le nupa a thleidang kho lo mi 7 an i tel tiah cathanh chung ah an langhter.
About The Author
