Min Aung Hliang Ralkap le NLD Party Aung San Suh Kyi
Salai Mangpau | 2023 June 26 — January 28, 2021 zaantlai hnu ahkhin Kawlram Counselor Aung San Suu Kyi nih a phone a hrawh. Ralkap kut a phan sual lai ti a phan caah a hrawh ti in amah he aa naihniam mi pahnih nih an phuan. A hawile cheukhat nih an thil an I tom. A ṭuanhawi nih an kan tlaih lai ti phan ah zaam ding in timhcia in an um. Cu ni chun ah Suu Kyi minung pawl le ralkap lubik Min Aung Hlaing minung pawl cu an rak I tong. Naypyidaw ah biaruahnak an rak ngei. Thimnak i Suu Kyi party nih teinak a hmuh mi kong ah a si. An biaruahnak cu thinhunnak he an donghter. Zei hnathlaknak hmanh an tuah kho lo.
Aung San Suu Kyi he naihniam ṭuanhawi le ruahnak petu minung 9 sin ah Reuters nih February 1 ah thawng a hal hna. Min phuan duh lo mi pakhat nih cun ralkap nih an tlaih cang hna tiah a phuan. Zei ruang ah ti belte tuan ah cun an chim lo. Ralkap nih uknak cu fawizaang tein an chuh hna. Cikhatte ah an hren dih colh ko hna.
January 28 ni ah kaphnih kar bia fak ngai in an rak I al cu si. Cu an biaruahnak a theitu minung pahnih nih hitihin a hnu ah an phuan. Ralkap nih an halmi bia cu Suu Kyi nih a cohlang duh hna lo tiah cu hna pahnih nihcun an chim. Cu an biaruah lio ah, Min Aung Hliang leikap minung nih mipi cozah lei cu an mawhchiat ngai hna. “Nan luan tuk cang hi ta, nan bia bo i nan ning zong a hngal” tiah an ti hna. Cuka an bia-alnak in aa telmi nih a phuan mi a si.
Ralkap zei ah an rel lo i an volhpamh bantuk a si tiah cuka hmun aa tel mi nih Reuters sin ah an chim. An i tonnak aa liim in, Suu Kyi orhlei pa Kyaw Tint Swe cu a therh in a therh. Kyaw Tint Swe thirhnak kong cu minung pathum nih an chim. Reuters nih amah Kyaw Tint Swe cu an hei pehtlaih nain a let hna lo.
“Civil cozah nih cun zeihmanh tuah khawhmi a ngei lo. Ralkap le hriamnam an ngei lo cuta, huham an ngei lo,” tiah an biaruahnak kong a thei mi pakhat nih a chim ve. Cuti cun, Suu Kyi si ah, Min Aung Hlaing si ah, uknak an I chuhnak kong ah pehtlaih khawh an si ti lo.
Cuti an biaruahnak a rawh le cangka Kawlram khuapi kip ah ralkap motor pipi cu hmuh an si. Yangon khuapi chung zong ah ralkap motor cu a tomtom in an hrilh tung cang hna. Ralkap dirpitu pawl ti in Shwedagon pura pawng ah minung a zaa in an au. Cu pawl cu thawnglatu nih biahal an timh hna ah an rak tlerhkhawn chin hna. A kiing ngai tawnmi Nay Pyi Daw zalam cung zong ah cun ralkap dirpitu pawl ti in an pawt lulh. Truck chung khat ko in an von bungh hna i lamcung ah ralkap dirpinak an langhter.
January 30 ah cun, ralkap nih phunghram cu kan kilhkamh lai i phung ning bang in kan cawlcangh a hau tiah an thanh.
2008 phunghram cu ralkap nih an rak ser mi a si. Rampi Emergency thilpoi um sual ah ralkap nih uknak lak khawh a si ti in cu phunghram nih a ṭial.
Crd/-
About The Author
