Sagaing Ramṭhen Kindaw Khua Ah PDF 15 le Mipi 3 Thah An Tong
Salai Mangpau | June 26, 2023 — Sagaing ramthen Kindaw khua pawng PDF sakhaan cu June 25 ah SAC ralhrang nih an luh hnawh i PDF 15 le mipi 3 an thi tiah RFA nih a chim.
June 25 zinglei ah SAC ralhrang mi 50 hrawng nih an luh hnawh hna. Kindaw khua hi Ayeyawaddy tipi kam Phayakung pawng ah a um mi PDF sakhaan pakhat a si.
SAC ralhrang nih zingka ah motor he tiva kam ah an rat hnawh hna. Zing 5:30am a si caah PDF pawl duty lo can te ah an luh hnawh hna. Mah PDF hi Ngazun khua lei mipi hriamtlai an si.
PDF a thi mi hi kum 20-30 kar mino an si. Pa ralkap 12 le Nu ralkap 3 an si. An ruak hi June 25-26 ah an vui hna.
SAC ralhrang nih Kindaw khua le Ooyin khua pawng PDF sakhaan an kah hna lio ah Sniper meithal pakhat telh in meithal zuun 15 le kuan pawl kan lak khawh tiah SAC nih june 26 ah thawngthanhnak a tuah.
NUG ralkap lei biachimnak nawl ngeitu nih 2023 kum May thlachung ah No.(1) hmunlei telhmi Ralkap umnak Sagaing, Magwe, Mandalay, le Shan ram chaklei kahdohnak ah PDF hriamtlai 41 nih ram caah an nunnnak an pek tiah a chim.
(Photo: Citizen Journalist)
About The Author
