Minister Salai Isaac Khen Cu Rian Dinhnak Nawl An Cohlan Cang: Pu Zo Bawi
City Hunter| 2018 May 17| Chin ramkulh cozah bu chungtel a simi Sipin Minister Salai Isaac Khen cu a rian in dinhnak nawl an cohlan cang tiah Chin ramkulh hluttaw speaker Pu Zo Bawi nih May 17 chun ah fehternak bia a chim.
Minister pathum rian thlenremhnak caah Chin ramkulh hluttaw nih rampi President sin i kan chuahpimi lakah Sipin Minister cu rian dinhnak nawl an pek tiah Pu Zo Bawi nih a chim.
“Chin ramkulh Sipin minister cu rian dinhnak nawl pek a si cang. A taangmi minister pahnih cu an rian hmunhma thlen an si lai i a si ko. Anmah pahnih rian le tuanvo cu kan chuahpimi ning te in a thlen an si ko lai. Kan chuahpimi ahcun an pathum ning in thlen timh an si nain atu hi Sipin Minister cu rian dinhter a si cang caah zeitindah a si lai timi cu ka hngal ve rih lo”.
Rian an tei lo ruang le an rian hmakal a nuarh tuk ruang ah Chin ramkulh cozah bu in Lam le Sul pehtlaihnak minister Pu Sui Thio, Sipin Minister Salai Isaac Khen, Social Affair Minister Pau Lun Min Thang cu rian thlenremhnak tuahpiak ding in ramkulh hluttaw nih rampi President sin ah an chuahpi.
Chin ramkulh cozah bu ah Chief Minister telh in minister zapi 7 lakah 5 cu NLD party in an si i pakhat cu Zomi Congress Democracy (ZCD) party le Ramri le Runvennak Minister pakhat an si.
Hi kong he pehtlai in Chin ramkulh cozah bu chungtel Sipin Minister Salai Isaac Khen cu RFA nih biahalnak ding an pehtlaih nain phone a tlai lo.
Ref: RFA Burmese
About The Author
