Thantlang Khuachung Inn Hlang Mi Caah Innhmun Thar An Samh Lai
Salai Elvis| 2018 May 17| Thantlang khuachung inn hlang mi hna caah inn hmun thar samhpiak dingin timhtuahnak kan ngei nain zeitik kan samh lai timi a fiang rih lo tiah penguk bawi U Swam Htet nih a chim.
Hi inn hmun samhnak ding kong cu May 5 sipin zungah Hluttaw palai hna le Sipin committee, penguk zung le tuanvo ngeitu na tonnak rak ngeih a si. Hi inn hmum samhnak ding hmun cu khuavelnak lam kam, Laipawng lung in Khuafo lam le Laipawnglung in Saisihchuak kar lak samh ding in timhtuahnak an ngei.
“Thantlang khuachung inn hlang mi an tam caah kei mah khual ka tlawn kar sipin zung ah meeting rak tuah si. A bik in inn hlangmi hna caah samh a si lai i zeitik dah kan samh lai timi cu a fiang rih lo. Hi kong ah a si penguk zung tlangtlak nak in tuah ding a si. Inn hmun kan pek nak ding hna cu khuavelnak lam a si mi Laipawng lung in khuafo lam le Saisihchuak lam ah a si. Hi rian cua rannak in kan tuah ko lai” tiah penguk bawi U Swam Htet nih TCP ah a chim.
“Hi hmun ah inn zeizat dah aa tlum lai timi le a herh bik mi sii-inn, sianginn le market hmunhma zong suai chung a hau. Cu kan suai mi Power Point in tuanvo ngei tu Hluttaw palai, zatlang bu hna tel in hmuhsak nak ngeih dih hnu ah ramkulh cozah hnatlak nak kan hal hna lai i an lungtlin ko ah cun rian thok a si ko lai” tiah U Swam Thet nih a chim.
A tu bantuk in Thantlang khuachung ah 2014 kum hrawng in Lungler lam ah inn hmun thar inn 150 tluk an rak samh bal cang i a tu lio ah inn 90 an sak cang i minung 56 renglo an um cang tiah theih a si.+++
About The Author
