Minister Thar Thimnak Kong Ah Pu Zo Bawi Nih Zeibia Dah A Chim?
City Hunter| 2018 May 23| Chin ramkulh Sipin, Electric le Industry Minister Salai Isaac Khen cu a rian in aa dinh cang caah amah airawlh ah minister thim a si lai maw? Tutan Chin ramkulh hluttaw caanhmaan tonpumhnak ah minister thim a um lai maw timi kong ah Chin ramkulh hluttaw speaker nih atu bantuk in The Chinland Post ah a chim.
“Sipin minister airawltu ding minister thar cu thim a si te ko lai. Sihmanhsehlaw, zeitindah thim a si lai, zeitik ah dah thim a si lai. MP chung in thim a si lai, a lenglei thiamsang (expert) dah thim an si te lai timi cu zeihmanh aa fiang rih lo. Cun, hi kong cu May 24 ah tuah dingmi Chin ramkulh hluttaw caanhmaan tonpumhnak ah ceih a si rih lai lo. Duhsah in ceih a si te lai.”
Minister Salai Isaac Khen cu rian a tei lo ruang ah amah lungtho te in dinhnak ca a tial. Cu ca a tialmi cu Myanmar rampi President U Win Myint nih phungningte in May 17 ah cohlannak le riandinhnak cathanh a chuahpiak cang tiah theih a si.
Salai Isaac Khen nih kan hnuzarh ahkhan atu cu rian dinhnak caah a kan pek ko cang nain rian aa laklawhmi a um caah zung ka kai rih ko. Rian apnak (incharge) zong ka tuah rih lo. Tutan rian kaa dinhmi hi a biapi bik in Hakha market saknak, Hakha Khuapi sersiamnak le Falam tiding peknak kong ah simanking in rian ka tei lo ruang ah a si tiah The Chinland Post ah a chim.
Salai Isaac Khen hi mizapi nih thimmi le rian pekmi minister a si lo, a lenglei thiamsang (expert) in laakmi le rian pekmi a si. Salai Isaac Khen cu Chin ramkulh Sipin, Electric le Industry minister a si pin ah Chin ramkulh cozah bu chimnak nawlngeitu pakhat zong a si.
Amah aiawh ah atu lio Chin ramkulh hluttaw chung in MP pakhat maw rian pek a si te lai, a lenglei mi dah an laak than te lai timi cu a fiang rih lo.
Salai Isaac Khen cu Hakha cu a um rih ko. Zion Tipil Khrihfabu nih thlahnak zong an tuahpiak cang. A rian tlaihmi vialte felfaite in a ap cang maw ap rih lo timi cu amah kan pehtlaih khawh lo caah TCP nih fiangte in kan hngal kho rih lo.
About The Author
