Mino He Aa Pehtlai Mi Phungphai Sermi Theihternak Le Fianhnak Hakha Ah An Tuah

Salai Ngun San Aung| 2018 February 28| Ramkomh Myanmar cozah nih mino he aa pehtlai mi phungphai mumai a ser mi theihternak le fianternak cu February 27-28, nihnih chung Hakha Town Hall ah an tuah.

Mino kong he aa pehtlai mi phungphai mumai (Youth Policy) kong ah ram komh huap in aa tel mi Salai Van Thawng Thang@Thawng Thwng Ray nih, “tutan hi Chin ramkulh ah avoi khat nak theihternak le fianhnak kan tuah a si. Hi kong cu cozah nih 2012 khan an rak ruah cang nain a tak in 2015 khan kan thawk. 2015 June thla ah Monywa ah Myanmar Youth Forum a um i cu lio ah cun NLD cozah nih ni 100 chung ah tuah ding an i timh mi chung ah mino he aa pehtlai mi phungphai ser ding ti mi aa tel i kan rak i ceih. Anmah nih cun ni 100 chung ah nan lim lai an kan ti nain kanmah mino leikap nih phungphai pakhat ni 100 chung lim cu a si kho lo, kum khat tal caan kan pe uh kan rak ti hna. Tu hi kum khat le cheu hnu lawng ah kan lim hi a si. Chin ramkulh in hin phungphai hran tial tu ah Salai Mang Hung le Salai Thang Loon an i tel i working committee ah keimah ka si” tiah a chim.

Tutan ahhin peng khat in minung 6 cio, Chin ramkulh leng in minung 6 le sianghleiruun lei in minung 4 tiin an dihlak ah minung 60 sawm an si i minung 52 an kai kho tiah kan theih. Inn tek a simi CYO, Hakha bel in minung pakhat hmanh an kai kho lo. Tutan ah a bik in an tuah mi cu Romkomh Myanmar nih mino kong phungphai a ser mi theihternak le fianhnak leng ah hmailei ah Chin mino nih tah hi phungphai chung in kanmah caah a thahnem ding mi kha lak in zeitindah kan ca thahnem ding in rian kan tuan khawh lai timi a si tiah kan theih.

Mino kong phungphai an ser mi kong he pehtlai in Thawng Thawng Ray nih, “a thangcho lio mi ram ah cun hi hi bia pi tak tak in kan herh mi a si tiah ka ruah. Nihin mino thaizing hruaitu ti a si bantuk in kan ram nih hi bantuk mino kong phungphai a ser mi nih hin mino caah thathnemnak tampi a chuah pi lai tiah ka zumh. Mino kong phungphai a um hnu cun Mino committee (youth committee) zong a um colh lai i hmai lei ah cun mino kong a tlangtlatu Minister tiang an kan chiah piak te lai tiah ruahchannak ka ngei. Cun tu tan ahhin peng kip aiawh thimnak le cu chung cun ramkulh huap hruaitu zong kan i thim lai. Cu hna nih cun ramkomh huap mino kong phungphai dal 16 chung in kanmah Chin mi caah lak awk a tha deuh mi zawn te te thim in kan miphun caah rian tampi an tuan khawh lai ka zumh” tiah a biapeh ah a chim.

Hi phungphai sernak committee ahhin Social Affairs Minister zong aa tel i ramkomh cozah nih a tlaih mi a si. Tutan zong ah Chin ramkulh Chief Minister, Social Affairs Minister, Sipin Minister, Lamsul lei Minister le Budget and Plan Minister zong an i tel kho.

Na ruahning rak langhter ve.. (Leave a comment)

%d bloggers like this: