Chin Ramkulh Bing Tamnak Bik Tonzang Peng Ah Bing Cinthlakmi Ekah 56 An Hrawh
City Hunter| 2018 March 1| Chin ramkulh Tonzang peng chung ah cinthlakmi bing ekah 56 cu tuanvo ngeitu cozah nih 2018 February thla chung ah an hrawhpiak dih hna tiah kan theih.
2018 February 22-28 tiang Tonzang peng chung ah cinthlakmi bing dum le lo pawl cu tuanvo ngeitu ralkap le palek phu hna nih chekfelnak le hrawhnak an tuah. Tonzang peng, Senam khuakomh ah bing cinthlakmi ekah 5, Anglun khuakomh ah cinthlakmi bing ekah 20, Lungtat khuakomh ah cinthlakmi bing ekah 15, Salzang khuakomh ah cinthlakmi bing ekah 5, Tonzang pengthen- Cikha khua, Suangzang khuakomh ah cinthlakmi bing ekah 11, a zapi bing ekah 56 cu tuanvo ngeitu hna nih an hrawhpiak dih hna tiah cozah tang ah a ummi IPRD Tonzang nih facebook cahmai ah an taar.
Hi kong he pehtlai in min langhter a duh lomi Tonzang peng mino hruaitu upa pakhat nih, “Kannih Tonzang peng mino kan ral ngan bikmi cu rithaisii a si, a bik in bing hi a si. Bing hi tuuhmawng tang ah an cin. Cozah nih chekfelnak an tuah i an hrawhpiak ko hna nain tuhmawng tang i cinmi a si tikah an hrawk dih kho lo. Cu bing an cinmi cu India ram lei ah an zuar theu. Cuti bing an cin ruang ah mino tampi kan rawk. Cun, fimcawnnak lei nakin bing cinnak lei ah mino tampi thazaang an chuah cang. Hihi Tonzang peng mino hna nih a fak bikmi zuamcawhnak kan tonmi a si” tiah The Chinland Post ah a chim.
Cikha khuami pakhat nih, “Cozah nih fakpi in bing cinmi hi hrawh taktak an duh ahcun a cimit lak in hrawh khawh a si ko. Thate le felfaite in an chekhlat lo, kumkhat ah ekah tlawmpal tibantuk in an hrawh i Kawlram mizapi theih in bing cingmi kan hrawh tiah thawng an thanh. Hiti bing cinmi a dongh khawh lonak hi bing cinmi cheukhat le cozah ralkap le palek pawl hi i hngalhthiamnak a tuahmi um dawh an si. Cu lo ahcun Tonzang peng hi akaupi zong a si lo. Rian kan tuan ve ko tinak men ah an i hrawhtermi a si ko lai” tiah The Chinland Post ah a chim.
Chin ramkulh ah bing a cin bikmi hi Tonzang peng an si. A luancia caan zong ah tuanvo ngeitu ralkap le palek nih atu bantuk in bing cinthlakmi tampi an rak hrawhpiak bal cang hna tiah kan theih.
Photo Credit: IPRD Tonzang facebook
About The Author
