Minung 11,000 leng SAC nih Terrorism Section (အကြမ်းဖက်မှုပုဒ်မ) in taza a cuai hna, Chin ramkulh ah 74 an tlaih hna
The Chinland Post | 2023 January 17 – Myanmar ramchung ramṭhen le peng 10 ah SAC nih hramhram in uknak a lak hnu ah minung 11,000 leng Terrorism Section in taza a cuai hna tiah SAC Minister pawl chimnak in thawng theih a si.
January 10 ah an tuah mi SAC Central Committee for Counter Terrorism (အကြမ်းဖက်မှုတိုက်ဖျက်ရေးဗဟိုကော်မတီ) meeting ah a rak kai kho mi Minister pawl nih an chim tiah Khit Thit Media nih a langhter mi SAC a thlithup meeting report ah hmuh khawh a si.
Meeting cu Chairman a si mi SAC ramchung kong Minister Soe Htut nih a hruai hna i peng le ramṭhen kip i ramri Minister pawl a si mi Colonel pawl an kai kho tiah theih a si.
Sagaing ramṭhen ah sualphawtnak phun 2,386 a um i pa 3,963, nu 285 tiah an zapi 4,248 an tlaih hna tiah SAC Colonel Win Naing Soe nih a chim.
Yangon ramṭhen ah sualphawtnak phun 4,576 a um i minung 2,305 cu taza an cuai hna. Shan ram ah sualphawtnak phun 695 in minung 928 an tlaih hna.
Rakhine ram ah sualphawtnak 42 a um nain minung 9 lawng an tlaih hna i Chin ramkulh ah pa 68, nu 6 tiah an zapi 74 an tlaih hna.
Kayah ram ah minung 557, Magway ramṭhen ah 756, Mandalay ramṭhen ah minung 1,490 sual an phawt hna i minung 807, Mon ram ah minung 216, Irrawaddy ramṭhen ah minung 671 sual an phawt hna tiah an chim.
Kachin le Karen, Taninthary le Bago ramṭhen Minister nih anmah sin ah minung zeizat dah sual an phawt hna ti kha a langhter lo caah theih khawh a si lo.
Meeting a kai ve mi palek bawi Kyaw Lin nih SAC nih hramhram in uknak a lak hnu thok in 2022 December 19 tiang ah Terrorism Section in sualphawt mi 17,828 a um i sualphawtnak 10,155 hi palek nih an check lio i 4,332 hi biaceih zung nih an check lio a si tiah DVB ah a chim.
About The Author
