Vawlei cung Company 45 leng nih SAC hriam chuahnak an bawmh
The Chinland Post | 2023 January 17 – American le Europe telh in vawlei cung ram 13 in Company 45 leng nih SAC hriam sernak (Defense Industry) an bawmh tiah SAC-M nih January 16 ah a thanh.
US, France, Germany, Australia, Russia, China, Israel, Ukraine, India, South Korea, Japan, Taiwan, Singapore ram hna ah hram a bunh mi Company hna nih SAC Defense Industry caah bawmtu thilri pawl an zuarh tiah theih a si.
China cozah nih a ngeih mi NORINCO Company cu SAC Defense Industry bawmnak ah a biapi bik in aa tel mi a si tiah report ah an langhter.
SAC cu raltuknak thilri hmang in mipi pawl a thah, nuhrin covo a buar caah vawlei cung Company ngan pawl nih SAC he sipuazi tuah lo ding in an hal.
SAC cu hramhram in uknak a lak hnu ah ramdang nih phihkharnak an tuah len ko nain cubantuk phihkharnak le hriam cawknak phihkharnak hna a in khawh nak hnga ramchung ah amah tein hriam chuah khawhnak sehzung pawl kha tangka tampi hmang in kum caan saupi a rak i zuam cang tiah UN upa hlun pawl nih an chim.
UN chungtel ram pawl nih SAC Defense Industry i rianngeitu pawl, Puaisa pawl kha phihkharnak tuah ding in Myanmar ram ruahnak a cheutu Council nih an hal.
An report chung ah cu company hna nih hriam chuahnak thilri lawng si lo in, thiamnak le training pawl zong an pek chih tiah an langhter.
About The Author
