Mipi Hunhimnak Tlangtar In Pyitutsit Ralkap Thazang Chap Aa Tim Mi Min Aung Hlaing
Salai Mangpau
Mipi hunhimnak biafang hmang in SAC bawizik Min Aung Hlaing nih January 6, Naypitaw ah tuah mi ramkhel party bu 40 he ton biaruahnak ah a chim.
Ralkap chan sining zoh tik ah mipi hunhimnak caah Pyituhsit bu zong a rak ser. April 2022 kum media he tonnak ah Major General Zaw Min Tun zong mah biafang cu a rak hman, ralkap, palek bawm chantu ah ramchung mipi zong tel a herhnak le mah bu a dirh mi paoh an herh mi thilri kan bawmh hna lai tiah an rak chim.
Khaupau dohthlennak hi kum 2 hlei kum 3 ka phan cang i SAC ralkap thazang hi a tlawn bik 35000 hlei an zor cang. Atu SAC ralkap a thi mi, hliamtuar mi, ralkap chuahtak in aa zaam mi, CDM a tuah mi hi nikhat hnu nikhat an karh. Hlan ahcun ralram a kal kho mi sing 2 hrawng an rak um tiah SAC ralkap hlathlai tu sin in theih a si.
Nihin ah SAC lei nih mipi tlangtar in thazang thar chapnak a tuah peng ko. A bik in Bago ramṭhen le Ayeyarwaddy ramṭhen lei ah mipi pyituhsit ralkap thazang lak in training a kai ter hna. Mipi tam deuh nih Pyituhsit lut duh lo in mipi ralkap lei ah thazang lungthin le pumpak in an lut i SAC ralkap cu an doh.
January zarhhnihnak 2024 kum in Daik U peng um khuate kip ah pyituhsit ralkap lut ding in minung 20 SAC lei nih an hal hna. Mah khuate innchungkhar ah pa an um lo ah cun kum 18 in kum 50 karlak nu hna pyituhsit ralkap lut ding in ralkap lei nih an hal tiah theih a si. Daik U peng khuate cheukhat cu SAC nih uknak a lak hlan ah tualchung mi pa hna cu ramdang a kal mi le Yangon le peng dang ah riantuan a kal mi an tam caah khua ah pa an tlawn i nu an tam theih a si.
Khuate kip pyituhsit ralkap dirh ding in a tlawm bik minung 20 in 50 tiang an khawmh. Pyituhsit bu dirh ding an um lo ahcun me zuh in hramhram in an lut ter hna lai tiah an ti hna.
Mipi hunhimnak pyituhsit tiah tlangtar in ralkap hna an thil tuah mi hi mipi cung duh poah in hramhram uknak, mithar laknak a tuah mi hi mipi lei nih ralkap an huat chinchin nak lam deuh a si caah SAC lei nih a kalpi mi strategies- Byuha a hman mi aa palh hlei ah ralkap uknak sungh zatlaknak lei a pamnak tu a si deuh cang.
About The Author
