MNA Nih SAC Ralhrang Caah Ramdang In Vanlawng Datsi Le Hriamnam A Luhpi Tawn, MNA Lutlai Ah Khup Khan Mung Aa Tel
Salai Mangpau | 2023 August 9 — SAC ralhrang kuttang um Myanmar National Airlines MNA nih SAC van ralkap hna hman mi datsi cu ramleng in a lutpi hlei ah ramchung zong ah SAC hriamnam cu hmunkip ah a phorh tawn tiah Khet Thit Media nih a langhter.
SAC van ralkap hman mi datsi cu ramdang in lutpi a har chin lengmang caah MNA vanlawng nih lamphun kip ser in amah MNA min in a lutpi peng. Ralkap vanlawng Datsi cu Department of Civil Aviation nih MNA he bawm in ramdang ah an cah tawn. Mah DCA zung rianṭuan pawl cu ralkap in civil lei aa thial mi Tu phaw aa hruk mi cenghrgia bantuk an si tiah theih a si.
MNA a lubik Chief Commercial ah Naing Saw Lun, DSA 27th intake ralkap sianginn chuak ralbawi hlun a si I amah changtu lutlai ah Chin miphun Khup Khan Mung DSA 10th intake ralbawi hlun a si.
Naite ah Myanmar Airways International- MAI bank tangka cazin cu Singapore ram hrambunh UOB bank nih July thla dih in phih/khar ding in biakhiahnak an rak tuah. MAI vanlawng nih a hmuh mi tangka miaknak hrampi hi SAC ralkap caah tangka kawlnak lam pakhat a si ruang ah atu bantuk in tangka bank cazin an kharpiak hna hi a si. US ram le UK ram hna nih SAC ralkap pawl a zizutnak an rak tuah mi kha zohchun khawh a si ruang ah atu bantuk in UOB bank lei nih hrialawk ṭha lo in MAI tangka bank cazin an phih/khar a si.
UOB lei nih July 1 in MAI bank cazin chung um tangka lut/chuak cazin a tuah dih lai. July 31 ah tangka kuatnak/check lethmah pawl a khar dih i, August 15 ni in Bank rianṭuannak vialte a dihlak in an phit/khar lai.
About The Author
