MNDAA Nih SAC Tanks Le Thirphen Motor Tanks 23, Howitzers Miakpi Liam 7 An Lak Cang
The Chinland Post | February 3, 2024 — Shan ram Chaklei 1027 operation chung ah SAC tanks le thirphen motor tanks 23, Howitzers miakpi 7 an lak khawk hlei ah ralkap tampi a thi mi le meithal he hriam chiah in a sungpe mi tampi an um tiah MNDAA nih thawngthanhnak a tuah.
MNDAA nih 1027 operation chung, Kokang ramchung peng 6, ramri gate 4, ralkap sakhan 300 leng, tanks le Howitzers telh in meithal thong renglo le kuan/zen tampi kan lak khawh tiah Tuluk ca in thawngthanhnak a tial.
Thirphen motor tanks an lak mi 19, Tanks 4 aa tel chih, mah chung in 5 cu mei an khangh.
Kokang ramchung ah kahdohnak ni 71 chung ah SAC ralkap 4,000 hlei an thi, mi 2,000 tlaih an si, hliamtuar mi a thong leng an si caah unau hawikom phu lei nih Myanmar tuanbia ah a um bal lo mi tuanbia thar kan tial tiah MNDAA nih a chim.
Unau hawikom phu nih 1027 operation an thawknak thla thum chung ah hriam chiah in a sung pe i nunnak zuah a si mi ralkap 6,000 an si cang. Mah hna cu Shan ram chaklei, Laukkai khua lak kahdohnak chung in 3,000 hrawng, Rakhine ram Kyaukdaw peng ah ralkap 500 hrawng le Rathetuang, Mrauk U, Minbya peng le Shan ram chaklei peng hna in an si.
Cun, SAC lei in ralbawi Brigadier General 7 hna hi kahdoh hau lo tein a sung an ka pek tiah a tial chap. MNDAA ralkap bu nih Ta’aung ralkap TNLA/ le AA ralkap nih October 27, 2023 kum ah 1027 Operation tuah in kahdohnak hram an thawk.
Photo – The Kokang
About The Author
