Hramhram In Uknak Lak Caan Kum 3 Chung Ah Chin Miphun 600 Leng An Thi
The Chinland Post | 2024 February 2 — Ralkap Council nih uknak a lak hnu 2021 February 1 in 2024 February 1 tiang, kum 3 chung ah Myanmar ram pumpi chung Chin miphun 628 an thi cang.
Hramhram in uknak lak a si hnu kum 3 chung ah Chin miphun pawl cung ah nuhrin covo buarnak le Chin miphun nih intuar mi dirhmun hna cu Institute of Chin Affairs nih February 1 ah a thanh i Chin miphun 618 an thi tiah a langhter.
Chin ramkulh Tonzang peng in minung 3, Tedim peng in minung 39, Falam peng in minung 69, Thantlang peng in minung 64, Hakha peng in minung 77, Matupi peng in minung 72, Mindat peng in minung 98, Paletwa peng in minung 10 le Kanpetlet peng in minung 13 tiah an zapi Chin miphun 445 an thi cang tiah ICA nih a thanh.
Cun Chin ramkulh hmunhma leng ah Chin miphun pawl nih khua an saknak Sagaing ramṭhen, Magway ramṭhen, Yangon, Mandalay le adang hmunhma hna zong ah a thi mi Chin miphun 173 an um tiah ICA nih a langhter.
A thi hna chung ah bomrap ruang ah a thi mi minung 28, tlaih/hren hnu ah a ruak hloh mi minung 11, sii-ai tlamtlin lo ruang ah a thi mi minung 22, tlaih hnu ah thah i ruak khangh mi minung 10, thong chung ah hrem in thah mi minung 5, vanlei kahdohnak ruang ah a thi mi 84 an um tiah cathanh ah an telh.
Hramhram in uknak lak a si hnu kum 3 chung ah ralkap le Chin dothlennak phu pawl karlak ah kahdohnak a fak chin. Atutiang kahdohnak chung ah ralkap lei 200 an thi cang i Chin dothlennak phu lei in 246 nih ram le miphun caah an nunnak an pek cang tiah a langhter.
Cun ralkap nih hramhram in uknak a hnu kum 3 chung ah Chin ramkulh chung nifatin eidin tirawl man cu a let 3, a let 5 in a kai tiah ICA nih a langhter.
About The Author
