Mogok ah SAC ralkap le PDF karlak ah kahdohnak a chuak i SAC lei in 30 deng an thi
The Chinland Post | 2023 January 24 – Mandalay ramṭhen, Mogok peng ah SAC ralkap le PDF phu karlak ah kahdohnak a chuak i SAC lei in 30 deng an thi tiah NUG Battalion 1222 nih Khit Thit sin ah a chim.
January 20 chun sml 12:30pm hrawng ah Moegok peng, Hungmai khuate pawng ah a um mi NUG Battalion 1222 an umnak sakhaan cu SAC nih vanlei in min 30 hrawng a kah hnu ah vawlei lei in SAC ralkap 200 hrawng nih phu 4 ṭhen in an kah hna hi a si. Kahdohnak chung ah SAC lei in 30 hrawng an thi tiah theih a si.
SAC nih vanlei in a doh hna lio ah Jet vanlawng 3 in bom lung 30 hrawng a thlak i Machine gun zong in voi 10 nak tlawm lo a kah hna. Cun vawlei lei in a rak kai mi SAC ralkap pawl zong nih 40MM, 60MM, M9 le Machine gun pawl hmang in pehzulh in an kah hna tiah theih a si.
Kahdohnak chung ah Battalion 1222 in lam hruaitu 1 vanlei in thlak mi bom ci nih a khen caah a nunnak a liam i adang hriamtlai 3 zong fak ngai in an i hliam tiah theih a si.
Kahdohnak ruang ah sakhaan an kaltak i Generator, Dynamo, cycle 5, eidin tampi, hriamtlai hna an bag le adang thilri cheukhat zong an sung tiah theih a si.
About The Author
