May 29, 2024

Myanmar Ralkap Cu Black List Cazin Ah UN Nih A Khumh Taktak Cang

0

City Hunter| 2018 April 18| UN Secretary General Antonio Guterres i buaibainak hmun a simi sex lei sualnak (tlaihhremnak lei) kongkau palai Patten nih April 16 ah tuahmi UN runvennak council kumdongh report a pek. Cu report ahcun Myanmar ralkap hi Rohingya cung thlanglamhnak a tuahmi dantatnak caah buainak hi timhciammamte in (master strategy ah chiah in) sualnak a tuah kong le Rohingya hna cu an chuahkehnak hmun in zungzal thawldawinak caah miphun cihmihnak a tuah tiah a langhter. Cu ruang ah Myanmar ralkap cu UN nih min thurhnom cazin (blacklist) ah a chiah.

Cu pin ah Rohingya sihne (judge) pakhat zong nih UN runvennak council nih Roghingya ralzaam buainak a kham in a runveng kho lo. Cu ruang ah atu bantuk sex lei sualnak le a dangdang mithah lainawnnak a chuakmi pawl dantatnak caah ramkip biaceih zung kha tuanvo a pek awk a si tiah Runvennak Council ceihmainak April 16 ah a chim. Sultana timi nuhrin covo lei sihne nih Myanmar ralkapnih nu pawl kha Rohingya miphun an sinak pakhat ruang ah a phuphu in tlaihhremnak, thlanglamhnak le thahnawnnak an tuah tiah UN council meeting April 18 cathanh ah an langhter.

Atu hrawng hi New York hrambunh HRW- nuhrin covo lei ngiathlaitu phu nih cathanh pakhat April 17 ah an chuah. Buainak a chuahnak hmun ah sex lei sualnak a tuah ti lunghrinhmi mibu cazin ah Myanmar ralkap cu UN nih a telh. Atu bantuk ningcanglo tuahsernak le buarnak kan tuah bal lo tiah Myanmar ralkap nih an al caah fakpi in dantatnak an tuah bal lo tiah an langhter.

Myanmar ralkap phu nih Rakhine ramkulh khuate 17 ah nu le ngaknu 300 renglo tlaihhrem an tong. Kum 6 tluk lawng a simi nu hna zong a phuphu in tlaihhrem an tong. Myanmar ram dirhmun hi ramkip biaceihnak khungzung (ICC) ah caanrau lo te ah chuahpi colh awk a si.

Buainak chung i sex lei sualnak he pehtlai in tukum caah thanhchuahmi UN Secretary General cathanh ah Myanmar ralkap cu a hmasa bik blacklist ah an khumh hi a si.

Myanmar ram aiawhtu palai Pu Hau Do Suan

“UN Secretary General kumdongh report ah nu hna le ngakchia hna covo pawl runvennak caah Myanmar ram nih a biapimi karhlannak a thawk khawh tiah cohlan a si ko nain a fek lomi sualpuhnak hrambunh in Myanmar ralkap blacklist ah an khumhmi hi ka lungfak tuk. Miphun cihhmihnak an tuah tiah sualpuhmi zong hi a fek lomi sualpuhnak sawhsawh an si. Hiti biafang an hmanmi cung ah ka lungtha lo tuk, ka dohkalh” tiah UN ah Myanmar ram palai Pu Hau Do Suan nih UN meeting a chim.

Sex lei sualnak sualpuhmi he pehtlai in zei bantuk nuhrin covo buarnak hmanh thuhnawh kan tim lo. A feki tette ngeih ahcun a buartu kha mi zei an sip oh ah runvenpiak lo upadi he aa tlak in dan kan tat lai. Eindin khua ah a cangmi he pehtlai in ralkap 7 cu rianhrang le thong kum 10 thlak ding in biaceihpiak an si. Cu nihcun upadi tang riantuannak caah cozah nih a fekmi biakamnak fiangte in a langhter” tiah Pu Hau Do Suan nih a chimchih.

Atu bantuk UN nih Myanmar ralkap cu blacklist (min thurhnom) cazin i a khumhmi cung ah Myanmar cozah le ralkap lei nih zeihmanh lehnak le thanhnak an tuahmi a um rih lo.
Ref: RFA Burmese

About The Author

Na ruahning rak langhter ve.. (Leave a comment)