Myanmar ram, bomrap ruang ah a nunnak a liam mi chung in cheuthum cheukhat leng hi hngakchia an si
The Chinland Post | 2023 February 7 — Myanmar ram ah 2022 January in 2022 December tiang kum 1 chung, bomrap ruang ah hliam a tuar mi le a nunnak a liam mi sualnak ngei lo mipi 390 an phan i cu chung ah hngakchia cheuthum cheukhat leng an i tel tiah UNICEF nih February 7 ah a thanh.
2022 kumkhat chung bomrap ruang ah upa a nunnak a liam mi le hliam a tuar mi 75 an um i cu chung ah 13 an nunnak a liam, 62 nih hliam an tuar tiah theih a si.
Kumkhat chung bomrap ruang ah hliam a tuar mi le a nunnak a liam mi hngakchia 133 an si. Hngakchia 35 an nunnak a liam cang i 98 nih hliam an tuar tiah UNICEF report ah hmuh khawh a si.
Sagaing ramṭhen ah hliam a tuar mi le a nunnak a liam mi sualnak ngei lo mipi 68 phanh caah a tambik a si.
A pahnihnak ah Rakhine ram nih a zulh i hliam a tuar mi le a nunnak a liam mi 68 an si tiah theih a si.
Atu UNICEF nih langhter mi cazin chung ah hin kahdohnak chung bomrap ruang ah a nunnak a liam mi hriamtlai le ralkap pawl telh a si lo i sualnak ngei lo mipi cazin lawng langhter a si tiah an chim.
Cun Myanmar ram ah siseh, adang khoika hmun hmanh ah hngakchia hna hi bomrap ruang ah aa hliam ding le a nunnak a liam ding an si lo tiah an langhter i bomrap hmannak zong hi dirter a herh tiah an langhter.
About The Author
