May 24, 2024

Pu Ngai Sak: Chin Party Kan I Fonh Rih Lo, Khuakhan Lairel Lio Lawng A Si Rih

0

Kehlei in: Pu Zo Zam, Pu Ngai Sak le Pu No Than Kap

City Hunter| 2018 April 4| Chin ramkhel party pathum an i fonh taktak rih lo, i fonhnak ding khuakhan lairelnak an ngeih lio lawng a si rih. An i fonh le fonh lo ding a donghnak bik biakhiahnak cu June thla a si te lai tiah Chin Party upa sin in kan theih.

Chin min hrambunh a simi Chin party lakah a ngan bikmi party pathum – Chin National Democratic Party (CNDP), Chin Progressive Party (CPP) le Chin League for Democracy (CLD) cu party pakhat ah i fonh ding in khuakhan lairelnak a kum kum in an ngeihnak cang. Cu pin ah Chin mi tampi zong nih i fonh hna seh ti an duhpiak cio hna nain an i fonh kho lo tiah kan theih.

Kehlei in: Pu Ngai Sak, Pu No Than Kap le Pu Zo Zam

The Hakha Post thanhca Vol.10, No.5, 2018 April 3 chuak ah Chin party pathum an i fonh cang tiah Pu No Than Kap biachimmi cherhchan an tialmi le Chin World nih 2018 April 4 chun ah Chin Party pathum an i fonh cang i CNLD min in hmatpungtin an tuah lai tiah an tial mi cung ah fon taktak a si rih lo tiah Chin Party upa cheukhat nih an chim.

CPP party haotu Pu No Than Kap nih, “Chin Party pathum kan i fonh cang tiah The Hakha Post i ka chim ruang ah kan party nih a kan sik. Cucaah, mah bia ka chimmi kha zeitindik zuh (hnon) than a hau. Cucaah, Chin party pathum an i fonh cang maw fonh rih lo timi kong cu zei hmanh chimding ka ngei ti lo” tiah The Chinland Post ah a chim.

The Hakha Post i Pu No Than Kap biachimmi cung ah CLD party haotu Pu Ngai Sak cu The Chinland Post nih pehtlaihnak kan tuah i atu bantuk in a chim.

“Chin party i fonhnak kong hi media ah chimphuan rih lo ding in hnatlaknak kan tuah cang. Zei ruang ah dah kan i fonh le fonh lo kong cu Pu No Than Kap nih a chim. Chin party pathum hi kan i fonh kho taktak rih lo. Kan i fonh khawhnak ding khuakhan lairelnak kan ngeih cuahmah liopi (process) lawng a si rih. A karlak ah policy le phungphai- zulhphung tibantuk tawlreltu pawl a herhning in ton biaruahnak le ceihmainak an ngei rih lo. Asinain a ralaimi May thla dongh asilole June thla thawk ahkhin Chin party pathum kan i fonh le fonh khawhlonak kong a donghnak bik biakhiahnak a chuak taktak cang lai. Ka nolh ta rih lai, Chin party pathum kan i fonh kho deuh rih lo, process a kal liopi lawng a si rih”.

kehlei in: Pu Zo Zam, Pu Ngai Sak le Pu No Than Kap

Chin party i fonhnak kong ah biatakte in a cawlcangtu Salai Ceu Bik Thawng cu The Chinland Post nih atu te bak ah khan pehtlaihnak kan hun i hiti hin a kan leh.

“Kan toncia thil zoh tikah Chin party i fonhnak kong media sin kan chimphuan ruang ah hnahnawhnak tete a chuak theu. Cu ruang ah tutan cu media ah chim ti lo ding kan ti. Chim ti lo ding kan timi an hun chim dih cang. I fonhnak le hmailei riantuantinak ding biakhiahmi le ceihmaimi tampi kan ngei cang. Asinain Chin party pathum kan i fonh cang tiah a chimtu hna khi party pathum nih tuanvo pekmi an si lo pin ah an biachimmi khi phunglut (legal) a si lo, phunglut lo (unlegal) a si. Kan i fonh le fonhlonak kong cu party pathum hnatlaknak he phunglutte in zapi sin ah kan thanh te ko lai. Party pathum hnatlaknak in thanh lomi khi cu phunglut lomi a si. Phundang in cun atu i Chin party pathum fonhnak kong an chimphuanmi khi cu a fek rih lomi a si. A fekmi le phunglutmi (zumhtlakmi) cu party pathum hnatlaknak te in hmunkhat ah thanhchuah a si te lai”.

Pu No Than Kap nih The Hakha Post ahcun, “Kan i fonh cang. Kan party thar min belte Chin National League for Democracy (CNLD) in hmatpungtin kan timh i Election Commission nih an kan cohlan lo a si ahcun Chin National Congress Party (CNCP) min in kan tawlrel than te lai. April 20 hlan ah mahle party cio nih kan ngeih ciomi zulhphung le phungphai dangdang kha kan chuahpi lai i kan zohfel hnu ah a tha bik le kan i funtomnak bik zulhphung fehter hnu ah hmatpungtin kan tuah lai” tiah a ti.

2017 kum Thantlang ah tuahmi Chin National Dialogue ah Chin party vialte nih Chin party fonhnak ding kong cathanh an chuah. CNDP, CPP le CLD hi i fonh hmasa u law nanmah pathum nan i fonh khawh a si ahcun kannih Chin party dang vialte zong kan i fonh ve ko lai tiah cathanh an chuahmi ahcun an rak langhter.

2010 thimnak tuah lio ah CPP le CNP (atu CNDP) nih MP thutdan an rak ngah veve. CNP nih MP thutdan 10 le CPP nih MP thutdan 11 an ngah. Asinain 2015 thimnak ah cun a thar dirhmi CLD telh in aho Chin Party hmanh nih MP thutdan pakhat hmanh an ngah cio hna lo tiah theih a si.

Chin Party i fonh tikah minthar sak an timhmi Chin National League for Democracy (CNLD) hi 1990 ah dirhmi le thimnak aa cuhmi Party a si rak si i MP hmunthum ah teinak an rak hmu. Asinain ralkap nih thimnak i teinak a hmutu kha nawlngeihnak pe duh lo in CNLD telh in dohkalhtu party vialte kha 1992 kum ah an hrawh dih hna.

About The Author

Na ruahning rak langhter ve.. (Leave a comment)

%d bloggers like this: