NLD Party Chimnak Nawlngeitu U Nyan Win Aa Din I A Thar Pahnih An Thim Hna

City Hunter| 2018 March 25| March 24, Naypyidaw ah tuahmi NLD (National League for Democracy) CEC (central committee) chungtel committee tonpumhnak ah party kong chimnak nawlngeitu a thar pahnih an thim hna. Cucu; Mandalay ramthen Chief Minister Dr. Zaw Myint Maung le Hluttaw palai report peknak zung tuanvo ngeitu Dr. Myo Nyunt an si.

Cu hlan i chimnak nawlngeitu taktak cu U Nyan Win a si. U Nyan Win hi chimnak nawlngeitu rian an peknak a sau ngai cang. Cu pin ah a kum khua a upat cang caah atu bantuk in an thlennak hi a si.

“Hi CEC ton biaruahnak ah party riantuantu hna cazin, policy le kalpimi pawl zeitindah kan chimphuan lai timi telh in party chung kongkau pawl kha a biapi in kan ceihmai. Party kong thawngthanhnak le thil sining kha ningcangte le a caanhmaante in kan thanh khawhnak ding ah atu bantuk in chimnak nawlngeitu pahnih in kan i thimnak zong hi a si” tiah chimnak nawlngeitu Dr. Myo Nyunt nih a chim.

Pyithu hluttaw Speaker bawmtu ah thimmi U Htun Htun Hein zong hi ton biaruahnak ah donnak le conglawmhnak an ngeih.

March 24 ah tuahmi NLD-CEC tonpumhnak ah U Nyan Win, U Hanthar Myint, U Ung Gyaing, U Win Htein, Dr. Zaw Myint Maung, Dr. May Win Myint, Daw Nan Khin Htwe Myint, U Man Joni, U Nyi Puh, U Phyo Min Thein, U Aung Soe, U Kyaw Khin an kai kho. CEC chungtel a simi Vice President thar U Win Myint belte a kai kho lo.

Ref: VOA, BBC

Na ruahning rak langhter ve.. (Leave a comment)

%d bloggers like this: