NLD Party Zungpi Hmai Ah Duhlonak A Langhtermi Minung 3 An Tlaih Hna
TCP-Thantlang| 2018 May 20| Mon ramthen Bilyin khua i Kayin miphun hna cu an dum le an leikuang tuahnak vawlei an chuhmi hna kongah cozah lei nih zohfelpiak ding le an hmunhma hmuh than dingin Yangon NLD zungpi hmai i duhlonak a langhter mi hna chung in minung 3 Ba-han palek nih an tlaih hna tiah theih a si.
“A tubantuk in kan tlaih hnanak cu aho nawl peknak um lo in Bahan khua chungah duhlonak an langhtermi ruang ah upadi ningin an hmalak i an lubik a simi minung pathum kan tlaih hna hi a si. Hi duhlonak an langhternak ruangah mizapi caah hna hnawh buaibainak le thinphan thlalaunak an pek hna ruang le mizapi umkalnak caah lam a hnoksak tuk ruang ah palek lei nih dantatnak nawl kan ngei hna” tiah Bahan palek Thine Win nih a chim.
Duhlonak a langhtermi hna hi Mon ramthen Bilyin khua in an ra i minung 50 tluk an si. Vawlei zohfeltu Committee an sermi phu hna cu thelnremhpiak ding le Bilyin peng chungah 1984-1985 kum lio in rak chuhmi vawlei ekah- 1300 renglo zohfelpiak ding ah a tu bantuk in Yangon NLD zungpi hmai ah duhlonak langhter in an hal hna hi a si.
Tamwe khuachung ah cun duhlonak langhternak nawl an pek ko hna nain cozah nih kan theihpi hna seh tiduh ah NLD zungpi hmai tu ah duhlonak an langhter caah an tlaih hna hi a si. May 21 ni zong ah Naypyidaw President zung le Pyi-the-ye zungpi hmai ah duhlonak langhter than ding zong an i tim rih tiah theih a si.
Ref: RFA
About The Author
