Northern Commander Major General Ko Ko Maung Le A Kuttang Ralbawi Rual Cu KIO Head Quarter Kahdohnak Kong He Pehtlai in SAC Zung Naypidaw Nih An Rak Tlaih Hna
Salai Mangpau | July 15, 2023 |
Northern Commander Major General Ko Ko Maung le a kuttang um ralbawi ngan 6 hna cu July 13 zaan sml 8:30pm ah SAC Headquarters umnak Naypidaw zung nih an rak tlaih hna tiah theih a si.
“Commander Major General Ko Ko Maung le Northern command riantuantu SAC ralbawi 7 cu KIO Headquaters pawngkam khuate kahdohnak an tuah lio caan ah atu bantuk in Naypidaw zung lei in an rak tlaihnak hna kong he pehtlai in , “ July 13 zaan ah Commander le a kuttang ralbawi rual zaanriah dumtinak (dinner party) an tuah; an dih hnu zaan 8:30pm ah an dihlak in tlaih an tong. Commander pa cu an tlaih lio ah kut khih a tong lo. A dang ralbawi cu kutkhih tlaih an si dih. Commander a nupi nih biachim caan tawite a hal hna nain biachimnak nawl an pe duh lo. Atu lio cu KIO Laiza Headquaters lei ah kahdohnak a um lio a si; a biapi bik caan a si caah nawl ngeitu bawi vialte Naypidaw zung in auh an si dih” tiah min langher lo Naypidaw ralkap zunglei thawngpe tu nih an chim.
“Commander Ko Ko Maung hi Anantpa khua buainak lio ah mibu tampi thahnak nawl a petu a si. Northern Commander a tuannak kumkhat a tling rih lo. Kachin ram a riantuannak a chiahru ngai. Hpakan peng um KIA hotu bawi sin ah ton biaruahnak a ngei i Pyakant lunghring (Jade) a fir. Tuluk (China) ram mirum (lawpan) he vawlei tang chuak thir mansung an fir. NDAK he konh in sui (Gold) an co. Hpakan ah Mine (bom) phorhnak nawl a awnh i mipi ralkap sin ah kuanzen tampi a phan. Anantpa khua mibu tampi a rak thah hna ruang ah Naypidaw zung lei nih an rak zumh mi cu atu mah pumpak rumnak caah a tuan. Atu KIO/KIA Headquarters kahdohnak ah Naypidaw in fial a si nain an sipuazi ( chawleknak) a zor sual lai tiah KIO/KIA cu biatak in a kap duh ti hna lo. A kuttang ralbawi zong amah bantuk an si dih ve ko. Cucaah Naypidaw zungpi lei nih direct in an rak tlaihnak hi a si ko “tiah ralkap thawng petu nih a chim chap.
Northern commander Ko Ko Maung le ralbawi ngan 6 hna lak ah, Hpakan Light Infantry Division (ခြေမြန်တပ်မ) LID 33 bawi, Light Infantry Division (ခြေမြန်တပ်မ) LID 88 bawi, le adang ralbawi telh in anmah he sipuazi riantua ti hawi zong tlaih a tong tiah Naypidaw ralkap zung lei thawng petu sin in theih a si.
About The Author
