NUG Minister Dr. Lian Hmung Sakhong le Gwangju Mayor an i tong

The Chinland Post | 2022 October 19 – NUG Minister of Federal Union Affairs Dr. Lian Hmung Sakhong le South Korea ram, Gwangju Mayor Mr. Kang Gi Jung cu October 18 Korea caan sml 3:10pm ah Mayor zung ah an i tong tiah thawng theih a si.

Dr. Lian Hmung Sakhong cu South Korea ah an tuah ding mi Federal kong ceihmainak ah a kai ding in a phak hi a si.

Gwangju Mayor zong nih South Korea cozah lawng si loin South Korea mipi hna nih atulio Myanmar ram dirhmun kha an theih, hramhram uknak tang ah a ummi hna i an thinlung zong kha kan theihthiam piak hna, NUG cozah zong kan in theihpi ko hna tiah a chim.

Cun South Korea cozah nih Pau dothlennak kha tha a pek peng i Myanmar ram zong Democracy lamcung a phak ṭhan khawhnak hnga kan in bawmh hna lai tiah biakamnak zong a chim.

Dr. Lian Hmung Sakhong zong nih South Korea ram zong hramhram in a rak uktu Chun Doo-hwan an rak dohnak 1980 kum i dothlennak tuanbia kha ṭha tein kan theih i kan i zohchunh, Korea cozah le mipi hna cungah lunglawmhnak tampi kan ngei tiah a chim tiah cathanh ah an langhter.

Cu tonnak ah NUG Minister nih South Korea cozah le NUG cozah hmunkhat tein rianṭuanṭi an duhmi kong pawl le a biapi in an herhmi bawmhnak pawl kong kha Mayor cu a hal tiah theih a si.

Cun Dr. Lian Hmung Sakhong le South Korea ram he pehtlai in NUG palai pawl cu Gwangju May 18 philh lonak Museum ah an kal i Martyr pawl upat peknak an tuah tiah a thanh.

NUG Minister Dr. Lian Hmung Sakhong cu NUG cozah an dirh hnu in South Korea ah a voikhatnak bik a phanmi NUG Minister a si.

Na ruahning rak langhter ve.. (Leave a comment)

%d bloggers like this: