Palek Bawi Hlun U Moe Yan Naing Insein Thonginn In A Luat Cang Lai
TCP-Hakha| 2019 January 31| Palek zulhphung kilvennak upadi pohmah 16(b)/22 in thong kumkhat thlak a tongmi Palek Bawi hlun U Moe Yan Naing (Doh-Ye-hmu) cu thaizing (February 1) in a luat cang lai tiah Insein thonginn tuanvo ngeitu nih Irrawaddy nih a chim.
U Moe Yan Naing cu Maungtaw peng, Indin khua pawng Bengali 10 thahnak kong a phozartu Reuters thawnglatu pahnih cu Yehmu-choh Tin Ko Ko nih thong rap chiah in a kan tlaihmi a si tiah a chimtu kha a si.
Cuti U Moe Yan Naing nih a chim tlawmpal ah a chungkhar (a nupi le a fale) hna cu Naypyidaw palek quarter in an thawldawi hna i dantatmi ruang ah kan hmuh awk a simi covo pawl zeihmanh kan hmu ti lo tiah chungkhar hna nih an chim.
Moe Yan Naing hi thawnglatu Ko Wah Lung le Ko Kyaw Soe Oo an tlaih hna hlan 2017 December 12 lio in tlaih a tong i an tlaih chung ni 120 renglo cu a chungkhar, sihne hna he hmuhtonnak nawl an pe lo.
Palek phu ni thong rap an chiahnak kong thonginn biaceihnak chung ah a chimtu U Moe Yan Naing cu Pen Myanmar phu nih zalongte in tial le chimnak nawl thiamhlei in a runveng i a hmangtu ti in rampi cozah riantuantu hlun tiah 2018 December 22 ah upat conglawmhnak laksawng an pek.
Reuters thawnglatu Ko Wah Lung le Ko Kyaw Soe Oo cu rampi thlithup upadi in taza an cuainak case ah palek bawi hlun Moe Yan Naing cu sualnak tuahtu tette in cozah nih an tuah. Asinain, Moe Yan Naing nih Reuters thawnglatu pahnih hi palek phu nih thong rap chiah in an tlaihmi hna a si tiah a chim hnu ah cozah nih zumhawk tlak lomi tette i chiahpiak ding in an hal nain biaceih zung nih an hnon.
Cu hnu ah Doh-Yehmu hlun Moe Yan Naing cu a rian in an phuah i palek zulhphung kilvennak upadi pohmah 16 (b) 22 in 2018 April 27 ah rianhrang le thong kumkhat thlak ding in bia an rak khiahpiak.
Ref: Irrawaddy, Mizzima
About The Author
