Paletwa Ah Kahdohnak A Fah Ruang Ah Khuami Zapi Ngawt An Zaam
The Chinland Post | 2024 January 9 — Chin ramkulh thlanglei, Paletwa khua ah kahdohnak a fah tuk caah khuachung um ralkap kuttang cozah rianṭuantu pawl le khuami zapi nih innlo an zaamtak tiah khuami le Paletwa pengkomh uknak council phu ṭuanvo ngeitu nih Khonumthung Burmese ah an chim.
“Khuachung cu ph line an hrawh caah minung zeizah dah an tan ti a fiang lo. A tam deuh cu ralkap kuttang cozah rianṭuantu pawl, mipi pawl nih khua an zaamtak. Khuachung ah a zaam kho lo mi upa pawl, a ngandam lo mi pawl an tang rih. Umkalnak a har mi pawl zong an tang rih” tiah Paletwa pengkomh uknak council Chairman Salai Myo Hteik nih Khonumthung Burmese ah a chim.
Paletwa khuapi chung palek sakhaan zong AA nih an lak cang i, cuka hmun ah a um mi palek pawl cu Kaladan tiva khatlei ral ah a um mi LIB 289 he an i fonh tiah theih a si.
Paletwa khuachung kahdohnak ruang ah khuami 2 an thi, 6 an i hliam i inn cheukhat zong a kaang tiah Paletwa khuami le pengkomh uknak council nih cun an chim.
“Mipi an zaam dih cang. Ralkap kuttang zung pawl zong an zaam dih tiah kan theih. Palek pawl cu Brigade 289 sin ah an va i fonh. January 8 zinglei zong ah kahdohnak thawngpang theih a si. Kahdohnak vanlawng voi 3 tiang a phan. Ngiathlai tu vanlawng pakhat zong a phan. Kaphnih karlak entainak a fak. Ni 3 le zaan 3 a rau cang, January 8 kha a dai deuh ngai” tiah Paletwa khuami nih Khonumthung Burmese ah a chim.
Paletwa peng ah a zaam mi minung 20,000 leng cu eidin le ngandamnak lei zohkhenhnak caah bawmhnak an herh hringhran ko tiah Paletwa pengkomh uknak council nih January 6 ah thawng an thanh.
“Atu Paletwa dirhmun hi a rauh hlan ah ei awk a dih lai, atu hmanh mipi cheukhat cu eidin an har cang tiah kan theih. Nifatin eiawk an har cang. Chiti le facang cu chim lo sii tlangkhat hmanh an har” tiah Salai Myo Hteik nih a chim.
Ramchung ramleng le vawlei cung phu pawl sin in bawmhnak a herh ko tiah bawmhhalnak zong an tuah chih.
AA nih Paletwa peng chung LIB 289 byuha sakhaan telh in kekal ralkap battalion 8 cu January 1 in a doh thluahmah tiah theih a si.
About The Author
