Paletwa i siahngakchia an i citmi tilawng SAC ralkap nih an kah i siahngakchia 2 an thihnak cungah ICNCC nih fak piin sual a phawt
The Chinland Post | 2022 August 4 – Paletwa peng ah SAC ralkap pawl nih kah ruangah siahngakchia 2 an nunnak a liam i cubantuk hramhram thiltuahnak cu fak piin sual kan phawt (Condemned) tiah Interim Chin National Consultative Council (ICNCC) nih ca a chuah.
August 2 ah Chin ramkulh, Paletwa peng tungmawa khua ah sianginn kainak in Kaladan tiva zul in a rak kirmi Yimawa khua siahngakchia an i citmi tilawng cu tungmawa khua khatlei Namada khua ah hram a bunhmi SAC ralkap nih an kah hi a si tiah theih a si.
SAC ralkap nih kah ruangah taang 5 a kai liomi kum 11 hngakchia Ai Nay Min Htun le Ai Aung Than hna an nunnak a liam i adang siahngakchia 2 le fimcawnnak lei zung rianṭuantu 1 tiah an zapi 3 fak ngaiin hma an pu tiah theih a si.
SAC ralkap nih kah ruangah a thimi siahngakchia pahnih chungkhar hna zong kan in ngaihchiat pi hna tiah ICNCC nih a thanh.
SAC ralkap nih Chin ramkulh chungah hramhram in thil a tuahmi pawl kha faak piin sual kan phawt i thlennak zuam a si lio caan ah tlukruannak um kho ding in kan tawlrel lai tiah cathanh ah a langhter.
Chin ramkulh chungah a rak lutmi SAC ralkap pawl kan ṭhawl khawh hna lawngah Chin mipi hna himnak an hmuh lai caah hramhram uknak hi a hram in a bongh tiang kanmah le ti khawhnak lamkip cio in rianṭuanṭi hna u sih tiah ICNCC nih forhfialnak a tuah.
About The Author
