Paletwa Kahdohnak Ah Ralkap Nih Chemical Aa Tel Mi Bom A Hman
The Chinland Post | 2023 December 4 — Chin ramkulh, Paletwa peng ah a cang mi kahdohnak chung ah ralkap nih Chemical Warfare Agents aa tel mi bom a hman tiah AA nih a thanh.
Paletwa peng ah a um mi ralkap Ta-run-ai le Hna-bu sakhaan 2 cu AA nih November 14 ah an kah, cu sakhaan 2 kahdohnak hi ni 20 a rauh hnu ah ralkap lei nih fak pi in kahdohnak a tuah ve i December 3 nikhat chung ah Jet vanlawng, Mi 35, Y8, Y12 hna in voi 30 leng kahdoh a bawmh hna tiah theih a si.
December 3 zaanlei sml 6:38pm ah ralkap lei nih Chemical Warfare Agents aa tel mi bom pawl a hman i Jet vanlawng pakhat in a rak kah hna, cubantuk in Chemical aa tel mi bom pawl hi Shan ram chaklei, Operation 1027 chung ah a hman bal tiah theih a si.
AA nih December 3 ah kahdohnak fak taktak a tuah i ralkap lei nih vanlawng kahdohnak voi tampi a tuah, AA nih cu ralkap byuha sakhaan 2 la kho ding in aa zuam cuahmah lio a si i kahdoh chung ah a sung tuk mi ralkap lei nih a pawngkam khuate pawl cu vanlei in a kah, hriamngan in a kah, khuachung inn a khangh, sualnak ngei lo mipi a tlaih hna, a thah hna tiah AA nih a chim.
Cubantuk in December 3 ah ralkap nih Paukdaw khua cu vawlei lei, ti lei le vanlei phu 3 fonh in kahdohnak fak a tuah i Paukdaw khuachung zong kahdohnak a fak, December 3 chun sml 2:00pm ah Ponna peng ah a um mi Ye-yo-bin khuate cu LIB 270 ah kahdohnak zeihmanh um lo pi in khuate chung ah hriamngan a kah i khua mipi inn a khangh leng ah khuami cheukhat zong a tlaih hna tiah theih a si.
Cun December 3 zaanlei sml 4:00pm hrawng ah Punna peng, Khamaungdaw khua cu LIB 270 nih kahdohnak um lo pi in mipi inn a khangh. Facang rian a ṭuan lio mi mipi pawl hramhram in vanlei in a kah hna. Paukdaw khua dawr pawl a khangh, zaan ah sang chung ah hriamngan in a kah, drone in sang chung ah bom a thlak caah ralkap nih timh ciamam tein sualnak a buar thluahmah tiah AA nih a thanh.
About The Author
