Paletwa Sianginn 118 Ah Cachimtu Pakhat Hmanh An Um Lo

0

Tawk Tling Thang| 2019 June 4| Chin ramkulh Paletwa peng chung sianginn 118 ah siangcachimtu saya/mah pakhat hmanh an um lo tiah kan theih.

Hi kong he pehtlai in Chin ramkulh cozah bu in chimnak nawlngeitu minister U Soe Htet nih atu bantuk in The Chinland Post ah a chim.

“Keimah pumpak hrimhrim Paletwa ka va phan. Khuabawi, fimcawnnak zunguk lutlai le siangcachimtu tampi he ton biaruahnak kan ngei. Paletwa peng chung sianginn 118 ah siangcachimtu saya/mah pakhat hmanh an um lo. Cu lawng si rih lo, sianginn 94 ahhin cachimtu pakhat cio lawng an um. Nikum zong ah atu bantuk in cachimtu an chambau ruang ah harnak tampi an rak tong. Tukum zong mah thiamthiam a si”.

“Tukum cacawn kum ahhin Paletwa peng siangsangrun cachimtu pakhat kha ramkulh dang ah aa thial i pahnih an rak lut. Sianglairun cachimtu hi Paletwa in hmundang ah minung 42 an i thial i 23 lawng an rak lut. Cu bantuk in siangniamrun cachimtu saya/mah 200 an i thial i minung 10 renglo lawng an rak lut. Nikum cacawn kum hmanh ahkhin siangcachimtu thazaang tamtuk a chambau. Cu pin ah tukum ah minung 200 hrawng a thar an i thial chap fawn. A rak lut tharmi le 30 hmanh an tling lo. Cucaah, Paletwa peng nih a rannak in siang cachimtu tampi ngah zokzok kan herh. Atu hmah ahhin sianginn 200 leng cu cacawng kho lo in an um ko. Cu ruang ah ramkomh fimcawnnak zungpi nih a rannak le a tha bik in siangcachimtu rian an kan pekpiak zokzok a herh” tiah Minister U Soe Htet nih a biapeh ah a chimchap.

Paletwa peng hi Chin ramkulh ah pehtlaihnak a har bikmi le a chia bikmi peng a si. Paletwa peng chung milu singkhat (100,000) renglo an um. Paletwa peng ah khuate khua 384 a um i sianginn zapi hi 400 hrawng a um. Paletwa peng hi Chin ramkulh ah tanghra sungh-awn result zong a chia lei ah aa tel lengmang tiah kan theih.

About The Author

Na ruahning rak langhter ve.. (Leave a comment)

%d bloggers like this: