Paletwa Telh In Khua 7 AA Nih A Lak Cang
The Chinland Post | 2024 February 13 — AA nih Chin ramkulh thlanglei le Rakhine ramri um Paletwa khua telh in khua 7 tiang a lak khawh cang tiah AA cathanh cherhchan in kahdohnak lei a hlathlaitu pawl nih an chim.
AA nih Paletwa, Bangladesh-Myanmar ramri um Taungpyo (Let-wei) khua, Paukdaw, Kyaukdaw, Mrauk U, Minbya khua hna a lak khawh cang.
AA nih February 11 ah a thanh mi cathanh chung zong ah Minbya, Kyaukdaw, Mrauk U khua um ralkap Brigade Headquarters, MOC Headquarters, Battalion Headquarters, palek sakhaan pawl hna pakhat hmanh tang lo in a lak khawh dih cang tiah an langhter.
Mebon zong ah SAC ralkap pawl February 12 thawk in hnu an tolh cang caah AA nih kahdohnak fak pi tuah lo in an lak mi khua a si tiah kahdohnak lei hlathlaitu pa pakhat nih a chim.
Asinain SAC nih Rakhine ram khuapi Sittwe telh in khua tam deuh cu a uk rih tiah a chim fawn.
“SAC ralkap pawl hi Maungdaw hmunhma ah an um rih. Maungdaw peng chung Gyi-gan-pin le Ging-chaung hmunhma pakhat a tang rih. Buthidaung kiangkap a tang rih. Nain AA nih an kulh dih cang. Sittwe a tang. Sittwe an kan kah sual lai tiah hlei zong an khiah cang. Mawṭaw in luh ding cu a fawi lo. Ti lam in luh a hau. Kyaukphyu peng zong a tang rih. Kyaukpyu zong hlei pawl bom an puah i an hrawh dih cang. Ramree a tang rih. Ramree zong ah ralkap pawl a tap in an tap cang. Ann zong AA le a hawikom phu pawl nih an kulh cang. A tang rih mi hna cu Tongup, Thandwe, Gwa tiah tampi an tang rih” tiah kahdohnak lei hlathlaitu pa pakhat nih The Irrawaddy Burmese ah a chim.
SAC ralkap le AA karlak, February 11 ah Maungdaw peng, Aungthapyay khua pawng ah kahdohnak a chuah bantuk in Buthidaung peng Inpauk khua pawng zong ah kahdohnak a chuak tiah cathanh ah an ṭial.
About The Author
