Pathein Peng, Ongchaw Khua Mino 35 Cu Ralkap Nih Zaan Ah An Tlaih Hna
The Chinland Post | 2024 February 15 — Mandalay ramṭhen, Pathein peng, Ongchaw khua in mino 35 cu February 14 zaan ah ralkap nih an tlaih hna i ralkap thar ah an khawmh hna tiah Khit Thit nih a langhter.
February 14 zaanlei ah Mandalay ramṭhen, Mandalay-Pyin Oo Lwin mawṭaw lam pawng, Pathein peng, Ongchaw khuakomh um Amaydaw khuate le Tamohsuu khua in mino 35 an tlaih hna, khuate uknak phu sin ah khuakhat nih mino 40 rak pe hna u tiah ralkap nih an chimh hna hnu ah mino pawl an rak tlaih hna hi a si.
Cun February 13 zaan sml 11:00pm zong ah Irrawaddy ramṭhen, Inkapu peng, Bepya khua in mino 5 cu ralkap caah an rak tlaih hna tiah theih a si.
Cun February 13 zong ah Mandalay ramṭhen, Nyaung Oo khua, zaan dawr ah mino pakhat cycle aa cit mi kha ralkap nih an kham i a dir lo caah an dawi an tlaih hnu ah mawṭaw cung ah an khumh.
February 14 zinglei ah Mandalay ramṭhen Mingyan peng, No. 2 sang zong ah sang uknak phu nih ralkap luhnak ding caah meeting an auh i cazin pek ding in an chimh hna tiah Khit Thit nih a langhter.
Cun February 14 ah pyusawhti le ralkap bawm in Gangaw peng, Tindaw khua hngakchia telh in a pawngkam khuami 15 an tlaih hna tiah Maung Media nih a chim ve.
February 14zinglei, Myitkyina zong ah mipi thuam in hriamtlai phu nih mino 3 an tlaih hna tiah DVB nih a chim ve.
About The Author
