Mongmit Khua Ralkap Nih An Kah Ṭhan Lio Ah Mipi 102 An Thah Hna, Kum Tlinglo Nu 3 Telh In Nu 4 An Tlaihhrem Hna
The Chinland Post | 2024 February 19 — Shan ram chaklei, Mongmit khua cu ralkap nih an kah ṭhan i an lak lio ah mipi 102 an thah hna leng ah kum tlinglo nu 3 telh in nu 4 cu an tlaihhrem hna hnu ah an thah hna tiah Khit Thit nih a langhter.
January 18 ah KIA le PDF phufonh pawl nih Mongmit khua cu an kah ṭhan i ni tlawmpal a rauh hnu ah khua hmunhma tampi an lak khawh, cu hnu ah KIA hruai mi ralkap pawl nih Mongmit khua an chuahtak hnu ah ralkap an lut i hmunhma an la, cubantuk in ralkap an luh hnu ah khuachung mi 102 nak tlawm lo an thah hna i kum tling lo, kum 13 hngakchia telh in nu 4 an tlaihhrem hna i an thah hna, cun PDF pawl nih an thah hna bantuk in an langhter,
Mongmit khua ah mipi 102 an thah mi hna chung in a tam deuh hi Mongmit khua, Shawzali le Lat-khoh-tan sang hna in an si, KIA ralkap pawl an chuah hnu ah ralkap nih khuachung lut in an thah hna, bom ral vennak khor chung ah aa dor mi mipi zong SAC ralkap nih an kah hna i an thi, cubantuk in nu a tlaihhrem mi le mipi a thattu hi Brigade 99 an si tiah Khit Thit nih a langhter.
SAC ralkap Brigade 99 nih Mongmit khua an luh hnu ah Ywadawlay khua pafa hna 2 an tlaih hna, a pa kha hri in an hren hnu ah a fanu kum 13 cu an tlaihhrem, cu hnu ah an pahhnih in an thah hna, cubantuk in Ongkyaw le Shwezarli khuate karlak ah nuva hna an tlaih hna i a vapa an thah i a nupi an tlaihhrem, Shwezali in kum 15 le kum 17 nu 2 zong an tlaihhrem hna hnu ah an thah hna tiah theih a si.
Cun Mongmit khua, Kyaukdaw meng 7 ar-dum ah ralkap nih kum 64 pa pakhat cu hri in an hren i a bittaling in an thlai hnu ah an khangh, PDF nih an tuah bantuk in langhter nain ralkap nih an buar tiah theih a si.
About The Author
