June 17, 2024

Pehtlai In Ruah A Sur Caah Aibur Khua Sianginn A Rawk

0

Salai Elvis| 2018 June 14| Zarkhat renglo chung ruah cat lo in a sur caah Thantlang peng Aibur khua siangsangruun then (thah-khuai) sianginn cu June 10 zinglei suimilam 1-2 kar hrawng ah a rawk tiah theih a si.

Hi sianginn a rawkmi cu pe 40 a si i taang sarih siangngakchia an thutnak zawn a si.

“Kan sianginn hi June 10 (zarhpi zan) zing suimilam 1 le 2 kar hrawng ah rawk seh law a dawh. Zinglei lawng ah kan hmuh ve. A rawkmi sianginn hi pe 40 a si i ca cawnnak khaan thum a um, hi chungah khaan khat lawng hman a si i tangsarih an thutnak a si. Penguk zung ah ca kan chiah i ramkulh zung ah nan chiah hau an kan ti” tiah Aibur khuabawi Pu Duh Hmung nih TCP ah a chim.

Hi sianginn rak sak lio ah mirang vawlei a rak i tel lo caah tuangtuan nih a tung an ei i a tu bantukin a rawh colhnak hi a si.

“Kan sianginn hi a kum sau pah cang caah cozah lei zong nih tihnung sianginn pakhat a si ti zong an kan ti len. A tung vaang zong hi aa dor dih cang. A cim thlu lo mi khaan pakhat ah tangruk an chiah hna i cu zong cu tihnung a si caah thialter ding an ti hna. A rawk mi sianginn cu pe 120 a si i a rawh taktak nak zawn cu pe 40 a si. Asinain aa tlaih dih ko caah a fekfuan ti lai lo i pe 120 a ning tein zungah ca kan chiah ko” tiah Pu Duh Hmung nih a biapeh ah a chimchih.

Atu a rawkmi sianginn cu 1996 kum ah rak sakmi si. An sianginn ah tanghra tiang a um, 2018 cacawn kum ah siangngakchia zapi hi 159 an si i cachimtu saya/ma 16 tluk an si tiah theih a si.

About The Author

Na ruahning rak langhter ve.. (Leave a comment)