President Nupi Daw Chu Chu Hodah Si? A Konglam Tawi
TCP-Online| 2018 March 28| Chungkhar pa cem nih ramkhel rian a tuan tak hna tikah hawi tluk an si kho ve ti lo. An re a theih pinah chungkhar zong in hmunkhat an um tti kho hna lo.
President U Win Myint zong hi Yangon ah inn khan a hlangmi a si. Ramkhel rian a tuannak ah ralkap cozah nih an buai hnawh peng tikah inn a hlannak inn ngeitu hna zong nih voi tampi thawl an tong tawn.
Hiti hmun dangdang ah inn thial an si tikah an fanu ngeihchun te zong ramdang ah kal in kuli rian a tuan. Hitluk in chungkhar ah harnak ton lio caan zongah hmai panh tein a um peng khotu cu Daw Chu Chu hi a si. Daw Chu Chu cu Danuh khuate i facang rialnak seh ngeitu hna fanu a si.
Photo: President nupi Daw Chu Chu
Cupin ah Thapyingo sii tuahnak ngeitu zong a si. Ramkhel rian a tuanmi he chungkhar an dirh hnuah an ngeih thilri vialte zong an zuar dih in cuticun harsa ngai in khua an sa.
“Atu ah hin sui nithawng hmanh khi i khuh kho hmanh sehlaw zeihmanh khi aa dang hlei in ka ruat hnga lo. Ka pasal ramkhel rian a tuan hramthok in zeitluk in kan har cu kaa theih tuk. Nain, ka lungdi riam lo. Kei cu mizapi a rawltam mi rawl a pe duhtu peng ka si” tiah 2016 kum lio khan Myanmar Times ah a rak chim.
An fapa ngeih chun te a thih lai hrawng, a pasal le thong chung ah a um. Nu pakhat ca cun tuar khawh lo ding tiang khin harnak a rak tuar. Tu ah ramkomh President a si hnu zong ah Yangon khua ah inn dot 4 nak Room pakhat lawng khi an ngeihmi taktak cu a si.
Pyituh Hluttaw Speaker a ngah ka hrawng khan Myanmar Times nih Daw Chu Chu cu bia an rak hal. A lehmi hna cu “Tamtuk te hi kan rak sung ko. Tamtuk kan sungh cang tikah tu ah cun zeihmanh khi a thar in ka ruat kho hlei lo. Zing le zan ka eikhim te rawl kan ei khawh cun a za ko” tiah a rak leh hna.
“Tu zongah hin zeihmah ngeihmi kan ngei hlei lo nain kan pa hi a riantuannak ah ka si khawhtawk in bawmh ka duh peng ko” tiah a chim.
Daw Chu Chu hi an pa U Win Myint ramleng khual a tlawn zongah zeitikhmanh ah a zul bal lo. Media hna hmaiah hei langh len zong khi a duh balmi a si lo. Dai tein mah um in um ko i an pa nih a herhnak paoh ah a hnulei in bawmhchan aa tim pengmi nu a si.
President le nupi nih an ngeihmi inn (Yangon)
Ramkomh President U Win Myint nupi Daw Chu Chu cu Irrawaddy ramthen U Thun Min le Daw Win Kyi hna i an fanu pathumnak a si. President he hin tangk 5 an rak kai lio tein aa theimi an rak si.
President U Win Myint cu cathiam pakhat a si tikah amah hrim hi dai tein a um pengmi a si. Tang 5 in Tang 8 tiang hmunkhat ah sianginn an rak kaiti. Tang 9 bel hmun dangdang ah an rak kai i Tang 10 ah hin Pathein khua ah hmunkhat an rak kaiti than.
Sihni kum saupi a rak tuanmi President U Win Myint le Daw Chu Chu hna nih hin fa phanih te lawng an ngei. Fanu pakhat le fapa pakhat an si. Atu ah an fanu Phyo Phyo cu Ocean Super Market ah Manger pakhat a si. City Mart Company zongah ruahnak petu dirhmuh in a um lio a si.
An fapa cu kum 16 a si (President U Win Myint thong a um lioah) ah damlonak ruangah nunnak a rak liam. Ramkhel an tuan ruang hin kum saupi inn ngei kho loin mi inn kip ah vak in an rak hlang tawn.
Anmah hmuhnak tangkaa zong fangkhat hmanh um loin tu an umnak Yangon inn zong khi mi nih an bawmhnak in a hmuh ceomi an si.
Cuticun kum caan saupi harnak lam an rak zawh hnuah 2015 thimnak ah Pyituh hluttaw in bual a rak co. Pyituh hluttaw MP in Hluttaw Speaker dirhmun a van phak tikah Daw Chu Chu cu hluttaw Speaker nupi tiah ti a rak si.
2018 kum March 28 ni in cun President nupi Daw Chu Chu ti a si cang.
Ref: Myanmar Times, Myanmar Note, Yaungpaysue
About The Author
