Pyithu Hluttaw Speaker Ah U T. Khun Myat Le A Bawmtu Ah U Htun Htun Hein Thim Le Fehter An Si Cang
City Hunter| 2018 March 22| March 22 ah tuahmi Pyithu hluttaw tonpumhnak ah hluttaw speaker U Win Myint zaka a airawltu thimnak an ngei. Cu thimnak ah hluttaw speaker bawmtu U T. Khun Myat kha hluttaw nih Speaker ah an thim i an fehter. Cu dih hnu ah Speaker bawmtu thimnak zong an peh colh tiah kan theih.
Pyithu hluttaw nih speaker bawmtu caah MP U Htun Htun Hein le Dr. Maung Tin an chuahpi hna. Pyithu hluttaw Speaker bawmtu caah MP U Htun Htun Hein le Dr. Maung Tin cu hluttaw nih thlithup mee thlaknak in an thim hna. U Htun Htun Hein a duhtu meefung 270, a duh lotu meefung 133 an si. Dr. Maung Tin a duhtu mee 143 le a duhlotu mee 262 a si caah U Htun Htun Hein cu Pyithu hluttaw Speaker bawmtu ah thim le fehter a si.
Atu bantuk in thimnak an tuah cu Pyithu hluttaw Speaker U Win Myint nih March 21 ahkhan a rian a chuahtak ruang ah a si. Speaker bawmtu rian a tuanmi kha Speaker ah an thim i thutdan a lawngmi Speaker bawmtu caah Pyithu hluttaw Upadi ahran committee haotu U Htun Htun Hein kha mee tamdeuh hmutu sinak in thim le fehter a si.
“U Win Myint President si ding cu nan hngalh bantuk khan fehter khawh a si ko cang. Pyithu hluttaw Speaker cu U Htun Htun Hein a si ko lai. U Htun Htun Hein cu NLD CEC ah aa tel. U T. Khun Myat kha Speaker pek a si lai lo” tiah Monywa Aung Shin nih March 21 chun ah a chim. Asinain a chimning bantuk si lo in MP T. Khun Myat tu kha hluttaw Speaker a si i MP U Htun Htun Hein cu speaker bawmtu lawng a si tiah theih a si.
Ref: DVB, Pyithu Hluttaw
About The Author
